Ең алдымен Тоғыс тұрғын алабында орналасқан №120 жалпы орта мектепке барып, 300 орындық қосымша оқу корпусының құрылысымен танысты.
Айта кетейік, мұнда құрылыс жұмыстары 80 пайызға аяқталған, шілде айынан бастап абаттандыру жұмыстары қолға алынады. Білім ғимаратын дер кезінде қолданысқа беруді ескерткен Шыңғыс Жұмабекұлы құрылысшыларға еңбек қауіпсіздігін сақтауға мән беруді тапсырды.
Сайрам тұрғын алабы аумағында орналасқан 120 орындық білім нысанының қосымша құрылысы да қызу жүргізілуде. Құрылыс барысында Шыңғыс Жұмабекұлы мердігерлерге ғимаратты әрлеу жұмыстары кезінде дизайнер мамандарымен тығыз байланыста жұмыс жүргізуге ұсыныс берді.
Салаға жауаптылар Сайрам шағынауданындағы 300 орындық мектептің құрылысын да көзбен көрді. Құрылысшыларға өндірістік кестеден кешікпей, білім ғимаратын 1-тамызға дейін тапсыру қажеттігін ескертті.
Ал, Сайрам тұрғын алабында да «Яссауи» жекеменшік мектебінің құрылысы жүруде. Бұл аумақта екі мемлекеттік мектеп бар. Дегенмен бала саны көп. Жекеменшік-әріптестік негізде салынып жатқан нысан үш ауысымды білім алудың мәселесін шешті. Заманауи талапқа сай бой көтерген 475 орындық жекеменшік мектепті жаңа оқу жылында ел игілігіне беру жоспарлануда.
–Біздің алдымызда екі бірдей міндет тұр. Бірі – білім сапасын көтеру болса, екіншісі – мұғалімдердің біліктігін арттыру. Бұл ретте инфрақұрылымның да маңызы айрықша. Қала әкімі Мұрат Әйтенов бекіткен жоспарға сәйкес 2025 жылға дейін қалада 72 мектеп бой көтереді. Биылдың өзінде 32 мектептің құрылысы жүргізіліп, жыл соңында 10 222 орынға арналған 20 мектеп пайдалануға берілгелі отыр», - деді Шымкент қаласы әкімінің бірінші орынбасары Шыңғыс Жұмабекұлы.
Шымкентте жылдан жылға демографиялық өсім байқалуда. Бұл білім нысандарына деген сұранысты арттырып келеді. Есесіне, еліміздегі жеке инвесторлардың есебінен салынып жатқан мектептер саны бойынша бүгінде Шымкент көш бастап тұр.
