Алаңшалар орнатылды
Пятница, 13 Январь 2017 08:11Қалаға қосылған елдімекендерде абаттандыру жұмыстары қарқын ала бастады. «Жол картасы-2020» бағдарламасы аясында Жаңаталап, Қызылжар елдімекендерінде жалпы саны 13 аула абаттандырылып, жуырда ел игілігіне берілді.
Абай ауданы әкімдігінің мәліметінше, елдімекендерде инфрақұрылым жұмыстары кестеге сәйкес жүріп жатыр. Мұнда көркі көз тартар заманауи ойын алаңшалары орнатылып, тұрғындардың қуанышын еселей түсті. Республикалық бюджеттен бөлінген 162 млн теңге игеріліп, өткен жылдың соңында құрылыс жұмыстары толық аяқталған. Енді елдімекен аулалары жарқырап, жаңа кейіпке енді. Әсіресе, ойын балаларының көңілдері көтеріңкі.
Еске сала кетсек, өткен жылы Абай ауданы бойынша 50 аула абаттандырылып, 139 аулаға түнгі жарық шамдарын орнату жұмыстары толығымен аяқталған. Нәтижесінде аудандағы 258 ауланың 176-сы жаңарып отыр.
Шымкенттің үлесі – 43,7 млрд теңге
Пятница, 13 Январь 2017 06:45ОҚО-да 265 млрд теңгенің мүлкі мен ақша жария етілген. Бұл туралы Аймақтық коммуникациялар қызметінде Қаржы басқармасының басшысы Кеңесбек Мендебаев пен ОҚО бойынша Мемлекеттік кірістер департаментінің басқарма басшысы Әбдісалан Сағымбектің қатысуымен өткен брифингте мәлім болды.
Қаржы басқармасы басшысының айтуынша, жария етілгендердің ішінде құны 108,8 млрд теңгені құрайтын 11711 жылжымайтын нысан заңдастырылған. Оның 43,7 млрд теңгесі Шымкент қаласына тиесілі болса, 65,1 млрд теңге аудан-қалалардың еншісінде. Жария етілгендердің ішінде құны 75,2 млрд теңгені құрайтын 10225 тұрғын үй, 33,6 млрд теңгелік 1486 коммерциялық және басқа да нысандар бар.
Ал Қазақстан Республикасынан тыс жерлерде орналасқан, жалпы құны 422,3 млн теңгені құрайтын 50 жылжымайтын мүлік, 12 заңды тұлғалардың жарғылық капиталына қатысу үлесі және 3 бағалы қағаздар бойынша қабылданған өтініштер заңдастырылды. Сонымен қатар 155,9 млрд теңге жария етілді.
– Енді елімізде заңдастырылмаған мүлік үшін ешқандай ескертусіз бірден 530250 теңге (250 АЕК) айыппұл салынады. Ал егер бұл талап бір жыл ішінде орындалмаса, заңсыздық жойылмаса, 500 АЕК көлемінде айыппұл төлетіледі. Мүлкі мен қаржысын заңдастырып үлгермегендерді осындай жаза күтіп тұр. Ал осы үш кезеңде барлық дүниесін жария еткендер туралы мәлімет ешкімге берілмейді және олар мемлекет тарапынан барлық жағынан қорғалады, – деді Әбдісалан Жораұлы.
Еске сала кетсек, Қазақстан азаматтары 2020 жылдан бастап жаппай табыс декларациясын тапсырады.
Бағдарламаның жастарға берері мол
Пятница, 13 Январь 2017 06:40Шымкентте «Жастар практикасы» жобасы аясында жас мамандар прокуратура, полиция қызметкерлерімен бірлесіп қоғамдық тәртіпті сақтауға үлес қоспақ. Бұл туралы Еңбекші аудандық прокуратурасында өткен жиында айтылды.
Басқосуға облыс прокурорының орынбасары Әбіл Қожахметов, қала әкімінің орынбасары Қайрат Нұртай қатысты. Жиында белгілі болғандай, бүгінде Шымкенттегі құқық қорғау органдарынан 40 орынға сұраныс беріліп отыр. Жауапты сала өкілдері алдағы уақытта жас мамандарға қажеттілік арта түсетінін айтады. Тиісінше, қоғамдық көмекшілердің жалақысы да көбейетін болады.
Пилоттық жоба аясында жолдама алған жас маманның жұмыс кестесін жұмыс беруші мекеме анықтайды. Қазірдің өзінде облыс бойынша 200-ден астам халық жасақшысы қоғамдық тәртіпті сақтауға жұмылдырылып отыр. Айта кетерлігі, «Жұмыспен қамту-2020» бағдарламасының «Қоғамдық жұмыс» жобасы азаматтардың жасы мен біліміне қарамайды. Тек зейнеткерлік жасына жетпеген болуы тиіс.
Облыс прокурорының орынбасары Ә. Қожахметовтың мәліметінше, полиция бекеттеріне қоғамдық көмекшілер әлі де жетіспейді. Бұл ретте құқық қорғау саласына қосымша жұмыс күшін тарту бағдарлама қатысушыларын тұрақты жұмыспен қамтуға септігін тигізбек.
Биыл «Жастар практикасы» негізінде Шымкентте 1300-ден астам жас маманды жұмыспен қамту жоспарланған. Тиімділігі сол, қоғамдық тәртіпті нығайтуға атсалысқан жастардың болашақта осы салада жұмысын ары қарай тұрақты түрде жалғастыруға мүмкіндігі мол.
Делегаттар тізімі анықталды
Среда, 11 Январь 2017 07:17Шымкентте бүгінде 89 мыңнан астам адам жер кезегінде тұр.
Азаматтарға жер учаскесін заң аясында беру мақсатында жұмыстар атқарылып жатыр. «Нұр Отан» партиясы Шымкент қалалық филиалының кезектен тыс XXX конференциясында осы мәселе сөз болды.
Қала әкімінің орынбасарлары, облыстық және қалалық мәслихат депутаттары, аудан әкімдері, партия мүшелері өз ұсыныстарын айтты.
Жиында алдымен «Нұрлы жер» бағдарламасының жобасы талқыға түсті. Қала әкімінің орынбасары Нұралхан Көшеровтың айтуынша, қалада заңсыз берілген жерлер мемлекет меншігіне алынған. Азаматтарға жер телімін заң аясында беру мәселесі бойынша ҚР Ұлттық экономика министрлігіне хат жолданған. Тұрғын-үй қатынастары туралы заңға өзгерістер енсе, азаматтарды баспанамен қамту жұмыстары жеңілдей түспек. Жалпы, жер учаскесі берілу үшін алдымен ол жерде коммуникациялық жүйелер жүргізілуі тиіс.
Басқосу соңында 13-і қаңтарда өтетін «Нұр Отан» партиясы ОҚО филиалының кезектен тыс XXX конференциясына Шымкент қаласынан қатысатын делегаттардың тізімі анықталды. Олардың қатарында облыстық және қалалық мәслихат депутаттары, партия мүшелері бар.
Бекзат жаққан алау сөнбейді
Понедельник, 07 Ноябрь 2016 05:24Шымкенттегі Бекзат Саттарханов атындағы дарынды балалардың спорт мектеп-интернатына биыл 20 жыл толып отыр. Осыған орай аталған спорт мектебінің ұжымы таяуда Ел Тәуелсіздігінің 25 жылдығына орайластырып, мерейтойларын атап өтті.
Ер Бекзаттың есімін иеленген мектеп 1996 жылы ашылған болатын. Мектептің іргетасының қалануына септігін тигізіп, қаншама таланттың топ жаруына Ақжол Асқар мен Сейітбек Құлбаевтар зор еңбек сіңірді.
Салтанатты жиында Бекзат жайлы естеліктер айтылып, оның өмір жолынан өнегелі әңгімелер айтылды. Бұл білім ордасының республика бойынша көш бастап келе жатқанын айтқан Облыстық денешынықтыру және спорт басқармасының басшысы Әлібек Нұртаев Олимпиада чемпионының жеткен жетістігін үлгі етіп, жастарды отаншыл, еңбекқор болуға шақырды.
Салауатты өмірді насихаттаған мерекеде футболдан спорт мектеп-интернаты мен облыстық футбол мектебінің жасөспірімдері шеберлік байқасты. Нәтижесінде спорт мектеп-интернатының командасы қарсыластарын 4:1 есебімен ұтты. Ал бокстан өткен жолдастық кездесуде оңтүстікқазақстандықтар 5:3 есебімен тараздықтарға басымдық байқатты.
Жансейіт ТҮЙМЕБАЕВ: «Қала аумағын көріктендіру – жауапты жұмыс»
Среда, 02 Ноябрь 2016 05:43Шырайлы Шымкент – еліміздегі үш ірі мегаполистің бірі. Мемлекет басшысының алға қойған нақты міндеттерін жүзеге асыру жолында қалада атқарылып жатқан жұмыстар аз емес. Бұл орайда облыс әкімі Жансейіт Түймебаевтың төрағалығымен Шымкент қаласының дамуы бойынша мәжіліс өтті. Күн тәртібінде қаланың бас жоспарының орындалуы, жол инфрақұрылымы мен қала аумағына ағаш отырғызу сынды үш мәселе қаралды.
Жиынды жүргізген аймақ басшысы Шымкентті еліміздің үшінші мегаполисіне айналдыру үшін Елбасының осы жөніндегі тапсырмаларының жүзеге асуына барынша жауапкершілікпен қарап, оның дамуына бірлесе күш салу қажеттігін айтты. Бүгінде шаһардағы қала халқының саны 904 мыңға жеткенін ескерген әкім тіркеуге алынбаған бірқатар азаматтардың бар екенін, келер жылы статистикалық мәлімет бойынша қала тұрғындарының саны 1 миллионға жетеді деп жоспарланып жатқанын айтты.
Мәжілісте Шымкент қаласының бас жоспарының іске асырылуы мен күн тәртібіндегі басқа да мәселелер жайын баяндаған қала әкімі Ғабидолла Əбдірахымов 2025 жылға қарай қала халқының саны 1 млн 200 мыңға жетіп, көпқабатты тұрғын үйлердің қатары 52 пайызға арту керектігін айтты. Бұл мегаполис статусына енудің бірден-бір талабы.
Қазіргі таңда қала аумағы 80-нен астам ауыл типтес елдімекеннен тұрады. Оның 70 пайыздан астамы жеке сектор болып отыр. Бұл, әуелі ол жерлерге инженерлік, көлік және басқа да қызмет көрсету нысандарын салуда бюджеттен ауқымды қаржыны қажет етеді. Екіншіден, жерлер тиімсіз пайдаланылған. Осы мәселелерді шешу үшін қаланың бас жоспары бекітіліп, тиісті жұмыстар жүргізілуде.
Сонымен қатар, жол инфрақұрылымы, өзекті мәселелерді оңтайлы шешу, қала аумағында көгалдандыру жұмыстарын жүйелеу басты назарда екенін атап өткен қала басшысы, бұл бағытта қаланың даму тұжырымдамасы жасалынып, көлік инфрақұрылымы мен қоғамдық көлік мәселесі зерделенгенін жеткізді.
Бұл мақсатта «Green Bus» компаниясымен бірлесіп, муниципалды «Шымкент Bus» мекемесі құрылып, жыл соңына дейін 100 жаңа автобус алу жоспарлануда. Сонымен қатар, көлік тығыны жиі орын алатын 5 жерден жолайрықтар салу жөнінде шешім қабылданды. Қазіргі таңда, жобалық-сметалық құжаттары әзірленуде.
Қаланың көгалдандыру жұмыстарына тоқталған Ғ. Əбдірахымов өткен жылы 100 мың түп ағаш отырғызылса, биыл 112 мың түп ағаш егу жоспарланғанын айтты. Биыл көктемде оның 32 мыңы отырғызылып, ал қараша-желтоқсан айларында 72 мың түп жасыл желек егілмек. Сондай-ақ жиында сөз алған қала әкімінің орынбасары Н. Көшеров ағымдағы жылдың 9 айында қалада 364 заңсыз нысанның құрылысы тоқтатылғанын жеткізді.
Жоғарыда аталған мәселелерге қанық болған өңір басшысы қаланы көгалдандыруды әуежайдан бастау қажеттігіне тоқталып, шаһарды жасыл желекке айналдырып, Шымқала атына лайықты етуді міндеттеді. Сонымен қатар, шаһарға отырғызылатын ағаштардың сапасына және олардың сұрыпына назар аударуды атап өтті.
Жиынды қорытындылаған
Ж. Түймебаев Шымкентте баспанасыз жүрген жастарға қолжетімді болу мақсатында әлеуметтік тұрғын үйлерді көптеп салып, қала шетіндегі жасыл белдеудің көлемін 3 мың га-ға дейін ұлғайту керектігін айтты.
Дені сау ұрпақ – демографиялық өсу кепілі
Пятница, 28 Октябрь 2016 07:27Түгел сөзді түйіп айтатын халқымыз «Тазалық – саулық негізі, саулық – байлық негізі» деп бекер айтпаса керек. Басты байлық – адам жаны мен тәнінің амандығы. Денінің сау болуын қандай адам қаламайды дейсіз? Бұл орайда Елбасының «100 нақты қадам» Ұлт жоспарында айтылғандай, халықтың денсаулығын сақтау мәселесіне ерекше мән беріліп келеді.
Оңтүстіктің үлесі жоғары
Тәуелсіздік алған жылдардан бері елімізде денсаулық сақтау саласында атқарылып келе жатқан игі істер аз емес. Бұған дейінгі екi мемлекеттiк бағдарламаны (2005-2015жылдары) iске асыру нәтижесiнде Қазақстанда өмiр сүру ұзақтығы 70 жастан асты, халықтың жалпы өлiм-жiтiм көрсеткiшi 15,3 пайызға, ана мен сәби өлiмi 1,8 есеге төмендеді.
Егемендігімізді жариялаған ширек ғасырда облыста 347 денсаулық сақтау нысандары бой көтеріпті. Осы жылдар аралығында облыс халқының саны 1,8 млн-нан 2,8 млн-ға жетіп, 1 млн-ға өскен.
ҚР Статистика комитетінің мәліметіне сүйенсек, 1992 жылдың қаңтарынан 2016 жылдың наурызы аралығында 3 597 820 қыз және 3 775 851 ер бала туған. Дәл осы жылдары еліміздің демографиялық дамуына Оңтүстік Қазақстан (1 502 632) облысының үлесі зор. Салыстырмалы түрде алсақ, аталған уақыт аралығында өзге өңірлердің көрсеткіші мынадай: Алматы (826 196), Жамбыл (556 168), Қарағанды (524 559).
Тәуелсіздік жылдары елімізде 7 млн-нан астам сәби дүниеге келіпті. Елімізде ең көп бала туу көрсеткіші 2014 жылы тіркелген. Бұл жылы республика бойынша 275 083 бала дүниеге келген. Сәйкесінше бала тууына орай төленетін бір реттік жәрдемақы көлемі де артып келеді. Соңғы 13 жылда, яғни 2003-2016 жылдар аралығында жәрдемақы көлемі 7,8 есеге көбейіп, 13 мың теңгеден 103 мың теңгеге артты. Ал жәрдемақы төлеу жүйесі енгізілген осы уақыттан бері бала туу 60 пайызға көбейген.
Шүкір дейміз. Оңтүстікте алтын құрсақты аналар көп. Бүгінде біздің облыс бала туу көрсеткіші бойынша көш бастап тұр. Жалпы аймақта үшемдер мен төртемдердің дүниеге келуі сирек кездеседі. Өткен жылдың соңғы күні 235 сәби дүниеге келді. Олардың 103-і қыз, ал 130-ы ұл бала.
ОҚО денсаулық сақтау басқармасының мәліметінше, әдетте біздің облысымызда күніне 200-ге тарта бала дүниеге келеді екен.
Күрделі оталар өзімізде жасалады
Денсаулық сақтау саласы өңірімізде жыл сайын қарқынды дамып келеді. Мәселен, ТМД елдерінің ішінде облысымызда алғаш рет скрининг-орталық ашылды. Қазақстанда тұңғыш рет қалқанша бездің обырын және жуан ішектің обырын ерте диагностикалауға мүмкіндік жасалды. Сондай-ақ Облыстық онкологиялық диспансерде радиологиялық корпус пайдалануға берілді.
Шыны керек, медицинаның кешегісі мен бүгінгісін мүлдем салыстыруға келмейді. Қазір Облыстық кардиологиялық орталық республикада Астана мен Алматыдан кейін үшінші орында тұр. Онда жүрек ақауларын емдейтін қондырғы орнатылған. Сонымен қатар «Carto-3» үш өлшемді навигациялық жүйе сатып алынды. Бұл құрал науқастардың өмір сапасын жақсартуға айтарлықтай үлес қосуда, себебі осы арқылы жүректің кез келген жерін анық көруге мүмкіндік бар.
Айта кету керек, соӊғы жылдары өӊірде кадрлар тапшылығы 2 есеге, ауылдық жерлерде 2,5 есе төмендеді. Медициналық мамандардыӊ қайта даярлау және біліктілігін арттыру мақсатында 10 мыӊ маман білімін жоғарылатуда. Саладағы білікті дәрігерлердіӊ арқасында облыста өлім-жітім көрсеткіші 6,9-дан 5,1-ге дейін төмендеді.
Тәуелсіздік тартуының бірі – облысымызда алғаш рет ашылған Балалар кардиохирургиясы. Бұрын өңірде балалар жылдар бойы Ұлттық орталықта ота жасатуға кезек күтетін немесе шетелге, Астана мен Алматыға баратын. Ал бүгінде балалардың туа біткен жүрек ақауларына күрделі оталар облыстық балалар ауруханасындағы кардиологиялық бөлімде жасалады.
Аймақта денсаулық нысандары бой көтеріп жатыр. Оларды заманауи құрылғылармен жабдықтау – басты назарда. Бұл өз кезегінде халықтың өмір сүру жасын ұлғайтып, ана мен бала өлімін қысқартып, онкологиялық аурулардың азаюына септігін тигізуде. Бүгінде облыс дәрігерлері заман талабына сай туындап отырған жаңа міндеттер мен мақсаттарды меңгеру үшін алыс-жақын шетелдегі әріптестерімен тұрақты тәжірибе алмасып отырады.
Шымкентте онкологиялық орталық салынады
Таяуда ғана Шымкентке Белгиядан WILLEMEN Groep NV компаниясының өкілдері келді. Облыс әкімі Жансейіт Түймебаев компания президенті Йохан Виллемен кездесіп, өңір үшін әлеуметтік-экономикалық маңызы жоғары инвестициялық жобаларды талқылаған болатын.
Нәтижесінде, бельгиялық компания Шымкентте бой көтеретін онкологиялық орталыққа 250 млн еуро инвестиция салмақ. Осы кездесу аясында орталықтың құрылысы жобасын әзірлеу туралы екіжақты келісімге қол қойылды. Онкологиялық орталық 350 орынға арналған.
Жалпы, былтыр Шымкент қалалық медициналық колледжінің оқу корпусы, сонымен қатар 1 дәрігерлік амбулатория, 8 фельдшерлік-акушерлік пункті, 3 медициналық пункті, 9 басқа нысандар пайдалануға берілді. Биыл жаңа жедел жәрдем стансасы іске қосылды. Бұл денсаулық сақтау саласында көрсеткіштердің жақсаруына өз үлесін қосатыны анық.
Денсаулық сақтау және әлеуметтік даму министрлігі еліміздің медицина саласын дамытуға бағытталған 2016-2019 жылдарға арналған «Денсаулық» жаңа мемлекеттiк бағдарламасын жүзеге асыруда. Жаңа мемлекеттiк бағдарламаның маңызды бағыттары – аурулардың алдын алу мен алғашқы медициналық-санитариялық көмек деңгейiнде ауруларды басқару бағдарламасын енгiзу.
– Жаңа бағдарлама бұрынғы бағдарламалардың жалғасы болып табылады. Онда үш негiзгi сала қарастырылған. Бiрiншiден, сау адамдардың денсаулығын сақтауымыз керек. Онымен жаңадан құрылатын қоғамдық денсаулық қызметi айналысады. Екiншiден, ауруларды басқару қажет. Пациент есепте тұрып, бақылауға алынып, ауруды асқындырмау жолдары қарастырылады. Үшiншiден, бiрегей дәрi-дәрмекпен қамтамасыз ету жүйесi қолға алынады, – деп түсіндіріп өтті Денсаулық сақтау және әлеуметтік даму министрі Т. Дүйсенова.
Шымкентте кәсіпкерлік дамыған
Пятница, 28 Октябрь 2016 06:34Облыс орталығында кәсіпкерлікті дамыту үшін бүгінде қажетті жағдайлар жасалып отыр. Бұл туралы «Нұр Отан» партиясы Шымкент қалалық филиалының қоғамдық кеңес және кәсіпкерлікті қолдау кеңесінің бірлескен отырысында айтылды.
Жиында мемлекеттік қызмет көрсетудің сапасы мен қолжетімділігіне байланысты мониторинг қорытындылары туралы партиялық бақылау комиссиясының төрағасы Қанат Мейірманов
мәліметтер келтірді.
– Шымкентте кәсіпкерліктің дамуы жоғары. Ол үшін барлық жағдайлар жасалған. Облыстың инвестициялық тартымдылығын арттыру мен шағын және орта бизнесті дамыту мақсатында барлық қалалар мен аудандарда 11 индустриалдық аймақтар құрылған. Қазіргі уақытта индустриялық аймақтарда жалпы құны 212,5 млрд теңгені кұрайтын 168 жоба жүзеге асырылуда. 12 мың жаңа жұмыс орны ашылған. Сондай-ақ, кәсіпкерлерге қызмет көрсету орталықтары ашылып, «бір терезе» қағидасы бойынша қызмет көрсетілуде, – деді комиссия төрағасы.
Шымкент қалалық кәсіпкерлікті қолдау бөлімінің бас маманы Қарлығаш Шукен қала көлемінде дамып келе жатқан кіші және орта бизнес туралы баяндады.
– Ағымдағы жылдың қаңтар-тамыз айларында қалада тіркелген бизнес субъектілерінің саны 74569 бірлік, шағын және орта кәсіпкерлік субъектілерімен 280374,9 млн теңгеге өнім өндірілгенін немесе өткен жылдың тиісті кезеңімен салыстырғанда 102,5 пайызды құрап отыр, – деді ол.
Жиын барысында кәсіпкерлікті дамыту мәселелері бойынша кәсіпкерлер өз пікірлерін білдіріп, ұсыныстарын айтты. Бұл ретте барлық пікір, ұсыныстар тиісті мемлекеттік органдарға жолданатын болады.