Шымкент келбеті

Оңтүстік Қазақстан облысының әкімі, «Нұр Отан» партиясы облыстық филиалының төрағасы Жансейіт Түймебаев партия филиалының бас ғимаратында қоғамдық қабылдау өткізді. Бұл туралы ОҚО әкімінің баспасөз қызметі хабарлайды.

Қоғамдық қабылдауға келген Төлеби ауданы, 1-мамыр елдімекенінің тұрғыны Қапалбай Мырзақұлов 20 мыңға жуық халқы бар ауыл округіндегі емхананың ескіргенін айтып, жаңа емхана салуға қажетті қаражат бөлуді сұрады. Облыста жыл сайын әлеуметтік нысандарды, оның ішінде денсаулық сақтау нысандарын салуға айрықша көңіл бөлініп келетінін айтқан әкім ақсақалдың ұсынысы ескерілетінін айтты.

Айта кетейік, биыл Шымкент қаласында жаңадан заманауи типтегі онкологиялық, туберкулезге қарсы ауруханалар мен симуляциялық орталықтың құрылысы жүргізілетін болады. Сонымен қатар, мемлекеттік-жекеменшік әріптестік аясында алдағы бес жылда облыста 10 нысанның құрылысы іске аспақ. 

Мұнан соң, қоғамдық қабылдауға келген Алматы қаласының тұрғыны, қазақ театрының іргетасын қалаушы, сыншы, драматург Жұмат Шаниннің немересі Райхан Шанина атасына облыс орталығындағы академиялық театр алдынан ескерткіш орнату жайын айтты.

Осы ретте аймақ басшысы театр тарланының 125 жылдық мерейтойына орай облыста 20 мәдени іс-шараның жоспарланып отырғанына тоқталып, ескерткіш орнату жөніндегі ұсыныс ҚР Мәдениет және спорт министрлігіне жолданғанын жеткізді. 

Қоғамдық қабылдауда облысымыздағы ЖОО-дағы маман даярлау ісі және білім сапасы жөнінде де сөз қозғалды. Осы тұста өңір басшысы Оңтүстік Қазақстан мемлекеттік педагогикалық институты филология және тарих факультетінің деканы Нариман Нұрпейісовпен пікір алмасып, алдағы уақытта ұсыныс күтетінін айтты. Қабылдау соңында декан облыс әкімін оқу орнында лекция оқуға арнайы шақырды. 

Тұрғындардың өтініш-шағымдарын тыңдаған облыс әкімі халықты мазалаған бірқатар мәселелердің шешімін табудың заңды жолдары қарастыру үшін тиісті сала басшыларына тапсырма жүктеді.

ҚР Премьер-Министрі Бақытжан Сағынтаев Мемлекет басшысы Нұрсұлтан Назарбаевқа республиканың ағымдағы жылдың 9 айындағы әлеуметтік-экономикалық даму қорытындылары туралы және негізгі мемлекеттік бағдарламалардың орындалуы жөнінде есеп берді. Бұл туралы Ақорданың баспасөз қызметі хабарлады.

Қазақстан Президенті қазіргі таңда жүзеге асырылып жатқан барлық бастамалардың келесі жылы әрі қарай тиімді іске асырылуының негізі қаланғанын айтып өтті.

– Бірінші кезекте, бюджетке тиісті түзетулер енгізілді. Сонымен қатар, барлық қажетті мемлекеттік бағдарламалар қабылданды. Соның ішінде, тиімді көлік-логистикалық инфрақұрылымын құрудан тұратын, «Нұрлы жол» даму бағдарламасының аясында халықтың әл-ауқатын арттыру шараларын қабылдау және республиканы жүйелі индустриалды-инновациялық дамумен қамтамасыз етудің маңыздылығы айқын, – деді Мемлекет басшысы.

Премьер-Министр өз баяндамасында республиканың әлеуметтік-экономикалық дамуының барлық негізгі көрсеткіштерінде оң серпіннің бар екендігін мәлімдеді. Инфляция деңгейі берілген параметрлерде сақталған.

Б. Сағынтаев Қазақстан Президентінің ағымдағы жылдың 9 қыркүйегіндегі Үкіметтің кеңейтілген отырысында берген тапсырмалары уақытылы орындалып жатқанын айтты. Сонымен қатар, ел экономикасын әрі қарай дамытуды ынталандыру мақсатындағы 481 млрд теңге көлеміндегі қосымша қаражаттың бөлінуі бекітілді. Сондай-ақ, Премьер-Министр күніне 90 мың баррель көлеміндегі өнім беретін «Қашаған» мұнай-газ кен орнының іске қосылғанын айтып өтті. Бұдан өзге, Б. Сағынтаев Мемлекет басшысына, бірінші кезекте, азық-түлік өнімдері мен негізгі қажетті тауарлардан бастап бағаларға және халық пен әлеуметтік мекемелерді жылумен үздіксіз қамтамасыз етуге, сонымен қатар, тұрғын үй құрылысы бағдарламасы аясында жоспарланған нысандардың уақытылы тапсырылуына тұрақты бақылау орнатылғаны туралы ақпарат берді.

Кездесу қорытындысы бойынша Мемлекет басшысы бірқатар нақты тапсырмалар берді.