Достық, бірлік, татулық қай кезде де керек. Еліміз түрлі қоғамдық мәселелермен бетпе-бет келіп отырғандықтан, ынтымақ-бірліктің маңызы да арта бермек. Облыс әкімі аппаратының «Қоғамдық келісім» мемлекеттік мекемесінде өңір тұрғындарымен кездескен ҚР Парламент Мәжілісінің депутаты Сауытбек Абдрахманов осылай деді. Халық қалаулысы облыстың аудан-қалаларын аралап, халықтың талап-тілегін тыңдап жүр.
Іс-сапардың мақсаты – Елбасы Жолдауының орындалу барысы туралы нақты мәліметтерден құлағдар ету, «100 нақты қадам» – Ұлт жоспарын жүзеге асырудың маңызын түсіндіру. Ашық сұхбат түрінде өрбіген жиында индустриаландыруға бет бұру, жаһандану, жастар тәрбиесі сынды мәселелер сөз болды.
Облыс әкімі аппараты ассам-блея хатшылығының меңгерушісі Мұратәлі Қалмұратов жетекшілік еткен жиынға облыстық ассамблея хатшылығы, ОҚО ҚХА қоғамдық келісім кеңесінің, облыстық этно-мәдени бірлестіктердің мүшелері және БАҚ өкілдері қатысты.
ҚР Парламент Мәжілісіне ҚХА арқылы сайланған депутат алдымен этносаралық бірлік пен келісімді нығайту, Мемлекет басшысының Қазақстан халқы Ассамблеясына жүктеген жаңа функционалдық бағыттарды жүзеге асыру мәселелерін баяндады.
– Экономикалық саясатта жасалған шаралардың бірі – индустриаландыру. Қазіргі күннің өзінде бес институционалық реформаны жүзеге асыру жөніндегі 100 нақты қадамның 23 пайызы орындалды. Ондағы 100 қадам толық іске асқанда даму да қарқын алады. Біз шикізатқа тәуелділіктен құтылуымыз керек. Мұнайы мен газы жоқ ел сияқты өмір сүруді үйренсек. Елбасы да мұны әрдайым айтып келеді. Бірақ оған әлі де көше қойған жоқпыз, – деді С. Абдрахманов.
Сондай-ақ, жиын барысында діни алауыздықтардың пайда болуы, жастар тәрбиесі сынды мәселелер де ортаға салынды. Рас, қазіргі жағдайда бүкіл әлемде қиын жағдай қалыптасып отыр. Бұл тұрғыда депутат жаһандануға бейімделу керектігін айтты. Ендігі міндет – жаһанданудың тетігін, амалын, мерзімін табу қажет.
Кездесу соңында қатысушылар тарапынан қойылған сауалдарға жауап берілді.
