Шымкенттік үлгілі отбасы
республикалық байқауға қатысады
Шымкентте облыстық «Мерейлі отбасы-2017» Ұлттық байқауының марапаттау рәсімі өтті. Салтанатты шараға қатысқан облыс әкімінің орынбасары Ұ. Сәдібеков байқауға қатысушыларды арнайы құттықтап, жеңімпаз отбасыларға сый-сыяпат ұсынды.
– Оңтүстік жеріндегі даналықтың үлгісін танытқан, ғажайып ұрпақ сабақтастығын көрсеткен мереке құтты болсын! Елбасымыз Нұрсұлтан Назарбаевтың: «Мен өз халқымды сүйемін. Оның мені бала кезімнен сабыр мен парасатқа баулығанын мақтан тұтамын. Сол үшін басымды иемін!» деген сөзі әр отбасына арналғандай. Отбасы – мемлекеттің бір бөлшегі. Елбасы бастамасымен өткізіліп отырған бұл байқаудың мақсаты – отбасылық құндылықтарды нығайту, өнегелі, тату шаңырақ иелерін насихаттау, – деді облыс әкімінің орынбасары.
Облыстық ішкі саясат басқармасының ұйымдастыруымен өткен байқаудың қорытындысы бойынша шымкенттік Каналбай Сейілбекұлы мен Ордабасы ауданынан келген Омаш Шапаевтың жанұялары жеңімпаз атанды. Олар Астана қаласында өтетін республикалық байқауға жолдама алды.
Мерекелік жиында байқау жеңімпаздарына облыс әкімінің дипломы мен қаржылай сыйлық табысталды. Байқауға қатысқан өзге 28 отбасыға бағалы сыйлықтар мен облыс әкімінің арнайы «Алғыс хаты» берілді.
Айта кетерлігі, республикалық байқауда Оңтүстіктің атынан сынға түсетін шымкенттік Каналбай Сейілбекұлы елге суырып салма өнерімен танылған қазыналы қария. Еңбек ардагері бүгінде 5 ұл, 4 қыз өсіріп, олардан 40 немере, 18 шөбере сүйіп отыр.
Конкурстың бірінші кезеңі аяқталды
Шымкентте «Мерейлі отбасы» ұлттық конкурсының бірінші кезеңі аяқталды. Отбасы құндылықтарын дәріптейтін байқауда 20 отбасынан екі жанұя үздік деп танылды.
Оның бірі – еңбек ардагері, Мақтарал ауданының Құрметті азаматы Каналбай Сейілбекұлы. Суырып салма ақындығымен өнерімен елге танылған мәдениеттанушы.
5 ұл, 4 қыз өсіріп, олардан 40 немере, 18 шөбере сүйіп отыр.
– Отбасының басты міндеті – елге, халыққа қызмет ету. Кемтарларға жәрдем беріп, кішілерді тәрбиелеу. Бұл байқаудың тәрбиелік мәні зор. Жастар мұндай шарадан тәлім, тәрбие алады, – дейді еңбек ардагері К.Сейілбекұлы.
Екінші үлгілі отбасы – Халық ағарту ісінің озаты, Арыс қаласының Құрметті азаматы Жұмабек Қансейітовтер әулеті.
Жеңімпаздар қала әкімінің «Алғыс хаты» және бағалы сыйлықтармен марапатталды. Өзгелерден оқ бойы озып шыққан екі отбасы облыстық кезеңде бақ сынайды.
Берекелі шаңырақ
Қыркүйек айының екінші жексенбісі – Отбасы күні.. Қазақ ұрпағымен мақтанады, мәңгі жасайды. Үлгілі отбасының қашанда тірегі әке, жылу таратар ана екені сөзсіз. Сондай жандардың бірі, жүрген өмір жолы өнеге, еңбегі зор – Шалхарбековтер отбасы.
Бүгінде отағасы Әбдірахман мен отанасы Ұлбосын 3 ұл, 2 қыз тәрбиелеп, 19 немере сүйіп отыр. 40 жылдан астам олар бір шаңырақтың астында тату-тәтті ғұмыр кешуде. Үлгілі шаңырақ өзгелерге өнеге. Еңбексүйгіштігінің арқасында ерлі-зайыптылар мақтаулы маман, өнегелі ата-ана атанды. Әсіресе, Ұлбосын Уалханқызының еңбегі ерен. Өмірдің сынақ сәттерінен сүрінбей өтіп, халық үшін қалтқысыз қызмет етіп келеді.
– Менің басымдағы қиындықтар отбасылық өмірден басталды. Үлкен отбасына келін болып түстім. Жолдасым 10 баланың үлкені болды. Қалған бауырлары жас. Мен қаланың қызы болсам да, үй жұмысына үйреніп кеттім. Қолымнан келмейді демедім. Кейін еншімізді алып бөлек шықтық. Өз қолымызбен үй салып, балалы-шағалы болдық. Оларды өсіріп жүріп, жұмыс істедім. Сырттай пединститутты бітірдім, – дейді Ұлбосын апа.
Қазір мерейлі отбасының 5 перзенті бір-бір әулет. Отбасының тұңғышы Ақберді Қазақ Мыс компаниясының президентінің орынбасары болып қызмет атқарады. Екінші ұлдары Абілғазы ірі кәсіпкер, үшінші ұлы Серғазы құрылыс саласындағы білікті маман. Қыздары Жанерке бес баланың анасы, аяулы жар. Ал Назерке Астана қаласындағы жоғары оқу орындарының бірінде проректор болып абыройлы қызмет етеді. Бүгінде отағасы Әбдірахман Шалхарбек қаржы бақылау департаментінен ревизор болып демалысқа шыққан. Ал Ұлбосын Уалханқызы зейнеткер болса да, ғұмырын бала тәрбиесіне арнап келеді. Қазіргі таңда «Ақзия А» ЖШС-нің директоры болып еңбек етеді.
– «Отан – отбасынан басталады» дейміз. Біздің де отбасы шағын мемлекет. Мен жолдасымды шаңырақтың президенті деп ойлаймын. Елбасы мемлекет билігінің, адам құқықтарының қандай кепілі болса, Әбдірахман да отбасымның кепілі. Мен оның шығарған қаулылары мен тапсырмаларын балаларға жеткізіп отыратын үкімет басшысымын, – деп әзілдейді Ұлбосын апа. Ұлғатты ұстаз, абзал ана жас аналарға көп балалы болудан қорықпау керектігін, алды өскенде кішкентайына қарап, қолғанат болатынын айтады.
Үйдің ырысы, шаңырағының шаттығы болған Ұлбосын Уалханқызынан жастардың үйренері көп. Отбасындағы ерекше сыйластық, жас буынға ой саларлық тағылымдары, ғибраты мол әңгімелері отбасыларына үлгі боларлықтай. Ұрпақтар сабақтастығын жалғаған, мерейі тасыған Шалхарбековтер отбасына қандай мақтау айтса да жарасады.
Үлгiлi отбасы – мемлекет тiрегi
«Мерейлі отбасы» байқауының облыстық кезеңі қорытындыланып, жеңімпаздар есімі белгілі болды. Осымен үшінші жыл қатарынан ұйымдастырылған ұлттық байқауға аудан, қалалардан іріктеліп, топ жарған 30 үміткер отбасы бақ сынасты. Шараға облыс әкімінің орынбасары Ұласбек Сәдібеков қатысып, жүлделі орындарға ие болған отбасыларға сый-сияпат тапсырып, облыс әкімінің құттықтауын жеткізді.
– Мемлекет басшысы Н. Назарбаевтың бастамасымен өткізіліп жатқан бұл байқаудың маңызы өте зор. Бұл байқауға біздің облыс тұрғандарының да қосқан сүбелі үлесі бар. 2014 жылы түркістандық Баймахановтар отбасы, ал былтыр Қуатбековтер отбасы жеңімпаз атанып, Елбасының қолынан марапат алған болатын. Ұрпақ өрбітіп, оларды ұлтжандылыққа, отансүйгіштікке тәрбиелеу, ізгі қасиеттерді бойына сіңіру әрбір отбасының басты міндеті. Барша отбасына амандық, бақ-береке, ырыс-құт тілеймін, – деді облыс әкімінің орынбасары Ұласбек Сәдібеков.
Сонымен байқау нәтижесінде кентаулық Ошақбаевтар отбасы бірінші орынға лайық деп танылды. Отбасы мүшелерінің төрт адамына демалыс шипажайына жолдама берілді. Сондай-ақ, енді олар республикалық сында облыс намысын қорғайды.
– Сексеннің сеңгіріне таяп қалсам да байқаулардан шет қалған емеспін. Ең бастысы отбасымыздағы жылылық пен береке осындай мәртебеге жеткізді. Енді күзде өтетін республикалық байқауда жеңімпаз атанып, Елбасының қолын алып келсек деген үмітіміз бар. 7 ұл-қыз тәрбиелеп өсіріп, олардан 25 немере, 22 шөбере сүйіп отырмыз. Барлық отбасыға осындай қуаныш бұйырсын, – дейді «Мерейлі отбасы» облыстық байқауының жеңімпаз жанұясының отағасы Қаратай Ошақбаев.
Ал екінші орын Сарыағаш ауданының үлгілі отбасы Кулгиновтарға, үшінші орын түлкібастық Ешенқұловтар отбасына бұйырды. Бұл екі отбасыға Алғыс хат пен үй теледидары, қалған отбасыларға музыкалық орталық тапсырылды.
Облыстық байқауда бақ сынайды
Өнегелі отбасы – елдің тірегі, өзгеге үлгі. 2013 жылы отбасы құндылықтарын насихаттау мақсатында Елбасы Н. Назарбаевтың жарлығымен «Мерейлі отбасы» ұлттық байқауы жарияланған болатын. Күні кеше Шымкентте дәстүрлі «Мерейлі отбасы» Ұлттық конкурсының бірінші кезең жеңімпаздары белгілі болды. Биыл үшінші рет ұйымдастырылған байқауға барлығы 23 отбасы қатысып, бақ сынауға ниет білдіріпті. Анкеталық іріктеу кезеңінің қорытындысы бойынша Әбдірахман Шалқарбеков пен Шаймерден Есенкелдиевтердің отбасылары жеңімпаз атанды.
«Оқушылар сарайында» өткен салтанатты марапаттау шарасына қалалық ішкі саясат бөлімінің басшысы Қанат Қалыбеков
пен қалалық ардагерлер кеңесінің төрағасы Исамуддин Ырысбаев қатысып, қала әкімінің құттықтауын жеткізді.
Жеңімпаз атанған жарасымды жанұяның бірі Әбдірахман Шалқарбеков жұбайы Ұлбосын екеуі 3 ұл, 2 қыз тәрбиелеп, олардан 16 немере сүйіп отыр. Әбдірахман аға облыстық қаржы бақылау комитетінде ұзақ жылдар қызмет етіп, зейнеткерлікке шықса, Ұлбосын апай бала тәрбиесімен айналысып, балабақша меңгерушісі қызметін атқарған. ҚР «Білім беру ісінің үздігі», «ҚР Ерен еңбегі үшін» медалінің иегері атанған. Бір шаңырақ астында жарты ғасырға жуық уақыт тату-тәтті ғұмыр кешкен Шалқарбековтердің ұл-қыздары өз орындарын тауып, немерелері өнер, спорт салаларында республикалық, халықаралық сайыстардың жеңімпазы атанып, ел намысын қорғап жүр. Ал Жанар мен Шаймерден Есенгелдиевтер 7 ұл-қыз тәрбиелеп отыр. Үлгілі әке ҚР ІІМ қылмыстық-атқару жүйесі комитетінің ИЧ-167/9 мекемесінің бастығы қызметін атқарып жүр. Еңбегі бағаланып, бірнеше орден-медальдарды кеудесіне таққан.
Жұбайы Жанар болса, қалалық №6 емхананың бірінші дәрежелі терапевт дәрігері. «Күміс алқа» иегері. Бұл отбасының да ұл-қыздары талай додада топ жарған.
Марапаттау кешінде олар өз өнерлерін көрсетуден аянып қалған жоқ. Әуелете ән салды, мың бұрала биледі, көркемсөзді нақышына келтіріп мәнерлеп оқыды. Енді екі отбасы облыстық байқауда бақ сынайтын болады.