Шымкент қаласының шығысындағы Сайрам және Төлеби аудандары бағытындағы автомобиль жолдары күрделі жөндеуден өтуде
Өңір басшысы Ж.Түймебаевтың тапсырмасына сәйкес бүгінгі таңда тиісті қаржы қаралып, құрылыс басталған. Жөндеу жоспарға сәйкес кезең-кезеңімен жүргізіледі дейді жауаптылар.
– Сайрам-Қарамұрт аралығындағы автомобиль жолын жөндеудің жалпы құны 2 039 млн теңгені құрап, биыл облыстық бюджеттен 750 млн теңге қаралды.
Жоспарға сәйкес аталған аумақтағы жол 2020 жылға дейін толық пайдалануға беріледі, – дейді облыстық жолаушылар көлігі және автомобиль жолдары басқармасының басшысы Нұрлан Байғұт. – Шымкент-Сайрам-Көксәйек жолын жөндеудің жалпы құны 4 128,3 млн теңгені құрап, облыстық бюджеттен биыл 700 млн теңге бөлінді.
Жол жоспарға сәйкес 2020 жылға дейін толық пайдалануға берілмек. Ал өңір тұрғындарынан осы жөндеу жұмыстарына байланысты болатын қолайсыздықтарға түсіністікпен қарауларыңызды сұраймыз.
Қазіргі таңда қосымша ішкі жолдар және уақытша айналма жолдар арқылы көлік қозғалысы мүмкіндігінше ретке келтірілген.
