Қаланың бас энергетигінің айтуынша, 2022 жылы 12 нысанның құрылысы жүргізіліп, жыл соңына дейін 1 қосалқы станция салынып, 22 мыңға жуық тұрғын сапалы электр қуатымена қамтылмақ.
– 2021 жылы Тұран, Асар-2, Солтүстік саяжай, Ынтымақ-2, Батыс, Жаңатұрлан, Ақтас-2, Жаңаталап, Сәуле, Нұртас елді мекендерінің ауыз су мәселесі түбегейлі шешілді. Биыл Құрсай, Сайрам, Қайнар бұлақ тұрғын алаптарына ауыз су құбыры тартылады. Нәтижесінде сапалы ауыз сумен қамту көрсеткіші 99 пайызға жеткізілмек, – деді Боранбай Нығметұлы.
Басқарма басшысының айтуынша, 2021 жылы Тұран шағынауданындағы кәріз сорғы станциясының құрылысы аяқталып, ондағы көп қабатты үйлер кәріз жүйесіне қосылған. Одан бөлек, Наурыз шағынауданының 3,5 мың және Самал-1 шағынауданындағы 22 мыңдай тұрғын кәріз жүйесіне қосылуға мүмкіндік алды. Нәтижесінде қала тұрғындарын кәріз жүйесімен қамту көрсеткіші 52,3 пайыздан 54 пайызға жетті. 2022 жылы 2 магистралды кәріз коллекторының, 1 кәріз сорғы станциясының және 13 ішкі орамдық жүйенің құрылысы жүргізілмек.
Сондай-ақ, өткен жылдың қорытындысы бойынша үшінші мегаполисте 104 көше жарықтандырылған. Қалада жарық шамдар орнатылған маңызды көшелер саны 324-ке жетіп, қамту көрсеткіші 30-дан 43,4 пайызға өсіп отыр. Бұл нәтижені арттыру мақсатында биыл қосымша тағы 102 көшені жарықтандыру жоспарлануда. Осыған байланысты қазіргі таңда аталған жобаның ЖСҚ-сы әзірленіп жатыр. Жоспарға сай 2022 жылдың соңында жарықтандырылған көше саны 426-ға жетіп, қамтылу деңгейі 43,4 пайыздан 57 пайызға өсуі тиіс.
