Осы жылдың 5 қаңтары күні №1 ауруханаға 1961 жылы туған науқас ауыр жағдайда келіп түскен. Дәрігерлер пациентті медициналық тексеруден өткізіп, ұйқы безі түтікшесіндегі бездің ұшында және денесінің бірнеше бөлігінде тасы барын анықтайды.
Күрделі әрі бірегей ота хируругия бөлімшесінің меңгерушісі Дәурен Қабыловтың жетекшілігемн жасалды. Ұйқы безіндегі тастардың көлемі үлкен болғандықтан, хирургтар операцияны ашық әдіспен жасадық дейді.
– Науқасқа ота лапаротомия трансдуоденальді папиллосфинктеротомия және вирсунговтомия пластика әдісімен жасалды. Операция кезінде қауіп басым болғанын жасырмаймыз. Отадан кейін науқас үш күн жансақтау бөлімінде бақылауда болып, палатаға ауыстырылды. Қазір жағдайы жақсы. Бұл отаның ерекшелігі – науқасқа қойылған диагноздың сирек кездесуінде. Бастысы – дертті анықтап, қауіптің алдын ала білдік, – дейді ота жасаған хирург Дәурен Қабылов.
Айта кетейік, қалалық №1 клиникалық ауруханада трансплантациялық отадан бөлек бауыр, ұйқы безіне, өт жолдарына, асқазан ісігіне және т.б. күрделі оталар жасалады. Бірегей оталарды жасауда алтын қолды хирург-дәрігер, марқұм Мади Хожаұлының шәкірттері ауруханада Сәбитхан Байтеміров, Дәурен Қабылов, Тайбек Садықов сынды білікті хирургтар командасы жасақталған.