Шымкент келбеті

Шымқала халқының саны күн санап артып келеді. Күн сайын қаншама жас отбасылардың шаңырағы шаттыққа бөленуде.

Бұл тек сол отбасылардың ғана қуанышы емес, мегаполисіміздің тұрғындарының санын толықтыра түскен жағымды жаңалық!
1 маусым – халықаралық балаларды қорғау күні мерекесіне орай Шымкент қаласы әкімінің орынбасары Гүлжан Құрманбекова шаһардың ең балғын тұрғындарын құттықтады.
Дайырбековтар отбасының қуанышы Сансызбай Нұрғиса Ерсінұлы мен Үндербаевтар шаңырағының жаңа мүшесі Үндербай Айша Даниярқызы Нұрсәт шағынауданында орналасқан облыстық №4 перинаталдық орталықта дүниеге келді. 1 маусым күні сәбилер Шымкент қаласының азаматы болып тіркелді. Жас тұрғындардың туу туралы куәлігін ата-анасына Гүлжан Мамытқызы тапсырып, оларға қала әкімінің құттықтауын жеткізді.
– Әр шаңырақтың бақытын еселеген перзенттеріміз аман болсын! Биылғы 1 маусым Нұрғиса мен Айша есімді сәбилер үшін ерекше күн болып қалмақ, – деп, қала әкімінің атынан сый-сыяпат жасады.
Ал Орынбекова Күнсұлу әже перзентханадан шығатын шөбересін қарсы алу үшін Төле би ауданынан арнайы келгенін айтты.
– 8 қыз, 2 ұлымнан бұл күнде 50 немерем бар. Бүгін туу туралы куәлігін алған Айша қызым – 25-ші шөберем! Қасиетті Рамазан айының құрметіне есімін әдейі Айша деп атадық. Қазағымның қыздары иманды, инабатты болып, өнегелі ұрпаққа ана болу бақытын көрсін! Халқымыздың саны арта берсін, – деп батасын берді әжей.
Қалалық жұмыспен қамту және әлеуметтік бағдарламалар бөлімі берген мәліметке сүйенсек, жыл басынан бері 13 103 нәресте дүниеге келіп, мемлекеттік тіркеуге алынған.

Шымкент қаласында «Әлеуметтік бес бастама – бейбіт өркендеу мен қоғамдық келісімнің кепілі» тақырыбында облыстық Қазақстан халқы Ассамблеясының ХХI сессиясы өтті.

Бұған дейін Елорда төрінде Қазақстан халқы Ассамблеясының ХХVI сессиясы өткені белгілі. «Бес әлеуметтiк бастама – қоғамның әлеуметтiк бiрлiгiнiң тұғыры» тақырыбымен өткен мәжілісте Елбасы Нұрсұлтан Назарбаев Қазақстан қоғамының бірлігін одан әрі нығайту қажеттігіне айрықша тоқталған-ды. Өңір басшысы Президент жүктеген сол бірқатар мақсат-міндеттердің облыста жүзеге асырылу барысын тағы бір түсіндіріп өтті.

– Елбасының байыпты бастамалары – әлеуметтік мемлекет құруды көздейді. Ол әрбірімізге әлеуметтік жауапкершілік жүктеп, ауызбірлігімізді одан әрі бекемдеуге жетелейді. Қазақстандықтар Тәуелсіздік берген толағай табыстарға куә. Басты жетістігіміз – биыл 20 жылдығы аталып өтетін еңселі Елордамыз. Ал алтын құрсақты аймақ тұрғындарының саны тәуелсіздік жылдарында миллионға артса, бүгінде шырайлы Шымкентіміз миллиондық белесті бағындырды, – деді Жансейіт Түймебаев.
Облыс әкімі төрағалық еткен сессияға қала, аудан әкімдері, облыс және қалалық мәслихат депутаттары, этно-мәдени бірлестік төрағалары мен зиялы қауым өкілдері қатысты.
М.Әуезов атындағы ОҚМУ ректоры Дария Қожамжарова «Қазақстан халқы Ассамблеясы» туралы Заңға енгізілген өзгертулер мен толықтырулар жайлы баяндама жасады.
Ал ҚР Ұлттық Банкі әзірлеп жатқан «7-20-25» бағдарламасы туралы Банктің ОҚО филиалының директоры Әнуар Ботанбеков баяндады.
– Несие бойынша сыйақы мөлшерлемесі жылына 7%-дан аспауы тиіс болса, алғашқы жарна 20%-дан аспайды. Ал несие мерзімі – 25 жылға дейін. Бағдарламаның «7-20-25» деп аталуы осыны білдіреді. Салыстырмалы түрде айта кетсек, қазіргі ипотеканың сыйақы мөлшері орта есеппен 14-16%-ды құрайды. Ал алғашқы жарна – 50%-ға дейін жетеді және төлеу мерзімі 15 жылдан аспайтын. Жаңа бағдарлама баспанамен қамту мақсатында тиімді жұмыс істемек. Сонымен қатар «7-20-25» бағдарламасы аясында бонус көлемін ұлғайту үшін «Нұрлы жер» бағдарламасына қосымша қаржы қарастырылмақ, – деді Банк директоры.
Облыстық Қазақстан халқы Ассамблеясының ХХI сессиясында республикалық «Дустлик» өзбек этномәдени бірлестігінің төрағасы Икрам Хашимжанов Қазақстандағы Өзбекстанның жылына орай, бауырлас елдер арасындағы байланыс жайлы пікірін ортаға салды. Ол: «Мамыр айында өңірімізге келген Өзбекстан делегациясын облыс әкімі Жансейіт Түймебаев жылы қабылдап, бар құндылығымызды көрсетті. Қазақтың салт-дәстүрі мен ұлттық ас мәзірінен дәм ұсындық. Сонда тарихи, кәсіпкерлік бағытта өрбіген сапардан зор әсер алған делегация мүшелері «Біз сіздерді дәл осы деңгейде күте алар ма екенбіз» деген таңданысқа толы ішкі ойын жасыра алмады» деді.
Елордадағы Ассамблеяның ХХVI сессиясында көтерілген «Қазақтану» жобасы туралы тақырыпты «Цеснабанк» АҚ қызметкері әрі қазақ шаңырағының келіні Юлия Дробязко тарқатты. Сонымен қатар Президент бастамасында айтылған жатақхана салудың маңызына М.Сапарбаев атындағы ОҚПИ оқытушысы Арзу Гурбанова тоқталды.
– Санасын тұрмыс билеген жастардан жасампаздық күту қиын. Мемлекет басшысы бес бастаманың бірін «Жоғары білім алудың қолжетімділігі мен сапасын арттырып, студент жастардың жатақханадағы жағдайын арттыру» мәселесіне арнағаны сондықтан. Біздің облыстағы жоғары оқу орындары 26 жатақханамен қамтамасыз етілген. Ал студенттер саны 150 мыңнан асады. Бүгінгі таңда 7600 студентке жатақхана қажеттілігі туындап отыр. Яғни, тағы 17 жатақхана қажет. Міне, осы тұрғыда біздің өңір Президент саясатын алғашқылардың бірі болып қолға алды, – деген Арзу Арифқызы барша этнос өкілдерінің атынан пейілі кең, дархан қазақ халқына алғысын айтты.
Жиында облыстың қоғамдық-саяси өміріне белсене қатысып, елеулі үлес қосқан облыстық кәріс этно-мәдени бірлестігінің төрайымы Роза Пак пен облыстық грузин этно-мәдени бірлестігінің төрағасы Заал Бочорашвили облыс әкімінің Алғыс хатымен марапатталды. Сондай-ақ облыстық Қазақстан халқы Ассамблеясының ғимаратында «Әр этностың бренді» жобасы аясында жергілікті тауар өндірушілердің көрмесі ұйымдастырылып, «Бірлігі бекем ел озады» тақырыбындағы бейнефильм көрсетілді. Облыстық этномәдени бірлестіктердің қатысуымен дайындалған концерттік бағдарлама көпшіліктің назарына ұсынылды.

Шымкент қаласындағы аллергоорталықтың ашылғанына 40 жыл толды. Тарих таңбалаған көпжылдық тәжірибенің құрметіне жуырда «Аллергологияның және пульмонологияның өзекті мәселелері» атты халықаралық ғылыми-тәжірибелік Конференция өтті.

Ресей, Өзбекстан, Қазақстанның барлық өңірлерінен келген медицина саласының үздіктері бас қосып, соңғы жылдары белең алып бара жатқан аллергиялық ауру түрлерін емдеу тәжірибесімен бөлісіп, оның пайда болу себептеріне тоқталды. Конференцияны ашып берген ОҚО денсаулық сақтау басқармасының басшысы Мұқан Егізбаев «Соңғы жылдары аурудың бұл түріне шалдыққан азаматтардың күрт артуына байланысты, халықаралық деңгейдегі мұндай жиынды тұрақты түрде ұйымдастырудың пайдасы мол» дейді. Баяндама жасаушылар қатарында м.ғ.д., профессор, «Аллергологтар және клиникалық иммунологтар ассоциациясы» республикалық қоғамдық бірлестігінің төрайымы Жанат Испаева тәжірибеден өткен дәрілік заттардың көрсеткіші жайлы мәлімет берді.
– Аллергияға қарсы «Момат Рино Адванс» спрейін тағайындау нәтижесінде аурудың тыныс алу жолдарындағы белгілері 89,6%-ға, ал жалпы белгілер 92,8%-ға төмендеген. Дегенмен, әлемдік тәжірибелерге сүйенсек, әрбір науқас үшін бір ғана дәрі-дәрмек тағайындау және дәл сол дәрінің әсерімен дертіне шипа табуы өте маңызды, – дейді Жанат Бақытқызы.
С.Асфендияров атындағы Қазақ Ұлттық медицина университеті «Аллергология және клиникалық иммунология» кафедрасының меңгерушісі Ж.Испаева «Аллергиялық риниттің жаңаша емі» атты баяндамасында «Мометазона», «Мометозол», «Кларисан», «Асметозол» дәрілік препараттарын кеңірек таныстырып, олардың қолдану әдісіне, әсер етуі мен тиімділігіне тоқталды.
Ал Өзбекстан дәрігерлері ассоциациясының мүшесі Мамлакат Рустамова:
– Соңғы кездері бұл аурудың көбеюіне тағам құнарлылығы мен құрамындағы өзгеріс себеп болып отыр. Әрине, экологиялық ахуалдың ықпалы да айтарлықтай, – дейді.
Өзбекстандық дәрігер қазақстандық әріптестерінен аллергиялық ренит және аллергиялық конъюктивит жайлы өте қызықты мәліметтерді естіп, тәжірибеге қажеттілерін түртіп алыпты. Бұл конференцияға науқасты ең бірінші қабылдап, аллергологқа жолдайтын өңірдің терапевт, педиатрлары да қатысты. Енді олардың аллерголог, пульмонологтармен өзара байланысы арта түспек.
– Аллергиялық аурулар ел ішінде қауіпті деп танылмағандықтан, ем алушылар оған аса мән бермейді және өздігінен ем қабылдайды. Нәтижесінде науқасы аз тіркелген саланың медициналық бағытта ілгерілеуіне кері әсерін тигізеді. Біздің мақсат – осы кемшіліктерді болдырмау, – дейді Шымкент қалалық көпсалалы ауруханасының бас дәрігері Рамазан Бектұрғанов.
Шымкент қалалық көпсалалы ауруханасының «Аллергология бөлімшесі» 1978 жылы «Фосфор ауруханасының» құрамында ашылғанда 60 ғана төсек орынға арналған-тын. Аллергиялық бөлімше бүгінде жылына 2400-2600 науқасты емдейді. Науқастардың 65 %-ын бронхы астмасымен ауыратындар құрайды. Аурухананың қабылдау бөліміне тәулігіне есекжеммен 15-20, бронхы астмасы ұстамасымен 10-ға жуық науқас келіп түседі. Санавиация желісі бойынша бір жыл көлемінде облыс бойынша 30-ға жуық, ал қала аумағында перзентханаларды қосқанда 200-ге жуық шақыртуға қызмет көрсетіледі.

1. №11 сайлау округі және сайлаушылар
2. Зейнеткерлер үшін бұқаралық спорттың маңызы зор
3. Депутат жайлы бірер сөз

Ерлан ОМАРОВ – Шымкент қалалық мәслихатының депутаты.
Отырар ауданы, Шәуілдір ауылының тумасы. Алты баланың әкесі. «Rauan» компаниясының атқарушы директоры. «Нұр Отан» партиясының мүшесі.

№11 САЙЛАУ ОКРУГІНДЕ

Шымкент қалалық мәслихатының депутаты Ерлан Мамырайханұлы – №11 сайлау округіне қарасты халық қалаулысы.
– Бұл округке Әл-Фараби ауданына қарасты М.Х.Дулати мен Ж.Адырбеков көшелерінің Ғ.Ілияевтан Т.Рұсқұловқа дейінгі аралығы кіреді. Қала орталығы болғанымен үйлердің басым бөлігі жекеменшік, жер үйлер. Сондай-ақ, шағын кәсіпкерлік нысандар көп, – дейді депутат.
Сондай-ақ, Қажымұқан орталық стадионы мен «Спорт» шағынауданына қоса А.Байтұрсынов көшесіндегі Әлімбетов аялдамасының маңы, бірнеше көпқабатты және жер үйлер №11 сайлау округіне қарайды. Е.Омаровтың айтуынша, сайлаушылардан келіп түсетін негізгі өтініштер көшелерді жарықтандыру, ирригациялық жүйелерді тазарту мәселесіне қатысты.
– Жекеменшік сектордағы жер үйлердің суару жүйесінде арықтардың бітеліп қалған тұстары да бар. Тұрғындар көше-көше болып ұжымдық осыған байланысты шағымданды. Сондай бір өтініш Ғ.Орманов көшесіндегі көпқабатты үйлерден түсті. Жауын-шашын кезінде үйдің тозығы жеткен шатырынан кеткен су тұрғындарды әбігерге түсірген, – дейді депутат.
Шатырдан аққан су жертөлеге жиналып, көпқабатты тұрғын үйге зақым келтіріген. Халық қалаулысы бұл жағдайды көзбен көрген соң мәслихатта көтереді. Мәселе қалалық тұрғын үй-коммуналды шаруашылық бөлімінің қатысуымен шешімін тауыпты.
– Қазіргі таңда көпқабатты үйлерді күтіп-ұстау тұрғындардың міндетіне кіреді. Тозығы жеткен, бұзылған есік, терезе, қабырға сынды дүниені тұрғындар өздері ретке келтіруі тиіс. Міне, сондықтан, бұл мәселе өзін-өзі қаржыландыру арқылы шешілді. Яғни, мұндай жағдайда қажетті шығындарды өтеу үшін тұрғындар бюджеттен қарыз алады. Сосын оны белгілі бір мерзімге дейін бөліп төлеп құтылады. Есесіне, тозығы жеткен үйдің шатыры дер кезінде ретке келтіріледі, – деп түсіндірді Ерлан Мамырайханұлы.
Алайда, жұмыссыз тұрғындардың жағдайын ескерген депутат бұл мәселеге қаржылай көмектесіп, бірқатар шығынды жабуды өз мойнына алған.
Бұған қоса, дәл осы маңдағы №42 үйдің ауласында балалар ойын алаңшасы болмаған. Дұрысы, ойын алаңшасы түсетін жер телімін өзіне баспана салу мақсатында басқа бір адам иеленіп алған. Е.Омаров ол азаматқа қаланың басқа аумағынан жер берілуіне ықпал етіп, көпқабатты тұрғын үйге тиесілі аумаққа балалар алаңшасын салуға қаражат бөліну жұмыстарын соңына дейін бақылап, назардан тыс қалдырмағанын айтады.
– Балалар алаңшасы салынып, жарықтандыру жұмыстары да сәтті аяқталды. Кейін игі істің құрметіне дастархан жайып, тұрғындармен жақынырақ таныстық. Жалпы, әрбір өтініш майда-шүйде болып көрінгенімен астарында бір немесе бірнеше адамның тағдырына байланып алған шырмауықтай мәселе болады. Кейде алаңсыз, бақытты өмір сүруге сол болмашы нәрсенің өзі себепші болуы мүмкін, – дейді депутат.
Сондай-ақ, жеке секторда кәріз жүйесі әу бастан бар болғанымен, оған қосылмай қалған үйлер бар. Арықтардың бетін бетондап, тазалау жұмыстарына кедергі келтірген жағдайлар да аз емес.
– Бұрын троллейбус жүрген жол болғандықтан М.Х.Дулати көшесінің бойында үлкен бағаналар қалып кеткен еді. Оның біразы алынды. Аталған көше толық жөндеуден өтіп, оның ішінде әбден тозып, жоқ болып кеткен аяқ жолдар да жаңарып қалды, – дейді Е.Омаров.

ҚАРИЯЛАР – БІЗДІҢ ҚАЗЫНАМЫЗ

Депутатты тұрғындармен қуана қауыштыратын маңызды күн, айтулы мереке – Жеңіс күні.
– Жыл сайын Әл-Фараби аудандық әкімдігінің бастамасымен 7-9 мамыр күндері Ұлы Отан соғысы ардагерлерінің үйіне кіріп, ұлы Жеңіс алып келген бейбіт өмірмен құттықтап шығамыз, – деген Ерлан Мамырайханұлы жастарға осы іс-әрекетімен үлгі болғысы келетінін жасырмады.
№11 сайлау округіне қарасты аумақта 6 ҰОС ардагері тұрады. Олар – Сәрсен Әбдінұров, Тұрдынияз Рахымов, Василий Котерев, Дәрменбек Садыбаев, Вера Утробина және Антонина Соколовалар.
– Қариялармен сөйлесіп, сонау зұлмат замандағы естігенде санам сергіп, демалып қаламын. Жасы жүзді алқымдап қалған ардагерлер қан майданда жауға қарсы соғыста жеңіп қайтса, келгеннен кейін де ел мен жерге талмай қызмет етті. Әрқайсысының жүріп өткен жолына қарап отырып, үлгі алуға болады. Отанға деген құрметім арта түседі. Міне, осындай сұхбаттарды жастарымыз көбірек тыңдаса, әрнәрсенің қадірін біліп, отансүйгіштік сезімі артар ма еді деп ойлаймын. Мұндай қазыналар ортамызда қашанға дейін жүрерін кім біледі? Бардың қадірін білсек деймін. Өткенде мерекелік көңіл-күйдегі соғыс ардагерлері мен кейуана, тыл ардагерлері ризашылықтарын білдіріп, елімізге, Елбасыға, партия мен қала басшыларына ақ баталарын берді, – дейді Е.Омаров.
Әңгіме арасында депутат бұқаралық спорт туралы да сөз қозғады. Шымкентте зейнеткерлерге арналған демалыс орындары қажет екенін алға тартты.
– Балаларға ойын алаңшасын құрдық. Жастарға, орта буын өкілдеріне баратын жер көп. Саябақ бар, спорттық жаттығу залдары, бассейндер, ойын-сауық орталықтары, кинотеатр, саябақ... Ал зейнетке шыққан соң қайда баруға болады? Зейнетке шыққанның бәрі шетел асып саяхатқа шыға ала ма? Жоқ. Біздің қариялар тек бала бағумен айналысып жүр. Неге олардың өз ортасын құрмасқа? Орталық саябақта ғана жиналып шахмат ойнайды. Оның өзінде жауын-шашын болса, кіріп отыратын ғимарат жоқ. Сондағы дәмхана, басқа да нысандарға кіріп, өтініш жасап отырады, – деген халық қалаулысы тағы бір мәселені алға тартты.
Шымкент қаласында спорттың көптеген түрімен айналысуға жағдай жасалған. Тіпті, спорттың бір ғана түріне арналған кешенді спорт мектептері де жұмыс істеп тұр. Ал кез келген азамат қатыса алатын, интелектуалды спорт түрі – шахматты дамытуға байланысты ардагерлер мен зейнеткерлердің және зиялы қауымның өтінішін Ерлан Мамырайханұлы қала әкімінің орынбасары Қайрат Ырзақұлұлына жеткізгенін айтты.

ТҰРҒЫНДАРМЕН КЕЗДЕСУ

Қалалық мәслихаттың депутаты Ерлан Омаров жуырда «Шымкент келбеті» газетінің шығармашылық ұжымымен бірге Байтұрсынов көшесінің бойындағы №45 Б және №45 В көпқабатты үйдің тұрғындарымен кездесті. Олар подъездегі электр жарығын есептейтін құрылғының есігін жөндеуден бастап, Әлімбетов аялдамасына шығатын көшенің жоғалып бара жатқан аяқжолын қалпына келтіруге дейінгі барлық өтініштерін жеткізді. Соның бірі әрі маңыздысы – осы үйлердің ауласында орналасқан «Дара Жылу Қуаты» мекемесінің жылыту қазандығы. Д.Қонаев даңғылының бойынан биік үйлер салынғаннан кейін қазандықтың мұржасынан шығатын түтін аулада қалып жатқан көрінеді.
– Бұл туралы тиісті мекемелерге арызданғанбыз. 2-3 млн теңге көлемінде айыппұл салынғаны туралы жауап алдық. Бірақ, біз айыппұл төлетуден не пайда көреміз? Қажеті қанша? Оның орнына сол қаражатқа мұржасын биіктетіп берсе дұрыс болар еді. Қыс маусымы басталғаннан қою түтін үйдің ішіне дейін кіріп, балалардың денсаулығына әсер етіп жатыр, – деді №45 В үйдің төрайымы Қарлығаш Рахиева.
Депутат та бұл мәселе бойынша ұсыныс хат жолдағанын, алдағы мәслихат отырысында тағы қозғау салатынын мәлімдеді.
Ал №45 Б көпқабатты үйдің төрайымы Забира Анарқұлова депутаттан ауланың сәнін бұзып тұрған газ ШРП жәшігінің ғимаратын жөндеуге ықпал етуін сұрады. Сондай-ақ, аулаға тағы бір күрделі жұмыстары қажет екенін жеткізді.
Бұл маңдағы тұрғындардың тағы бір шағымы – А.Байтұрсынов көшесіндегі Әлімбетов аялдамасына баратын аяқжолдың жағдайы.
– Көше бойында орналасқан кәсіпкерлік нысандар жаяу жүргіншілер жүретін жолды жауып тастаған. Дәмхана иесі аяқжолдың жартысынан көбін қоршап алса, автожуу бекеті қожайындары аяқжолды түгелімен бұзып, көлік кіруге ыңғайлап алған. Адамдар кей жағдайда транспорттың жолымен айналып жүруге мәжбүр болады, – дейді олар.
Е.Омаров сайлаушыларының ұсынысы мен шағымдарын тізіп, қойын дәптеріне түртіп алды. Кездесу соңында сайлаушылардың өтінішін негізге ала отырып жұмыс жасайтынын айтты.
Ерлан Мамырайханұлы – Отырар ауданы, Шәуілдір ауылының тумасы. Алты баланың әкесі бүгінде «Rauan» компаниясының атқарушы директоры. «Нұр Отан» партиясының мүшесі.
– Біздің компанияға бірнеше ЖШС қарайды. Олардың қатарында «Рауан-7» ЖШС кірпіш зауыты, «АгроНұрАзия» ЖШС жылыжай өнімдері, «Сарыағаш», «Uno», «Toy», «Joy», «Bizon», «Berry», «GGG» сынды 30-ға тарта брендтік сусындарды шығаратын «Рауан» ЖШС бар. 5 мамыр күні Шымкент қаласының тұрғындары үшін Наурыз алаңында компанияның 20 жылдығын атап өттік. 2000-ға жуық қала тұрғыны жиналды, – дейді компания басшысы.
Сусынның 10%-ын Қазақстанмен шекаралас Ресей, Қырғызстан, Қытай елдеріне эскпорттайтын өндіріс орнында 600-ден астам қызметкер жұмыс істейді.
– Төмен пайызбен несие аламыз. Компания үшін әр қызметкердің орны маңызды. Олар жұмылып жұмыс істейтін мотордың бір тетігі іспетті. Өндіріс үшін маңыздысы да сол. Біз әр қызметкерді айлығын уақтылы төлеп, қолдап отыруымыз керек. Әрі өнімімізді сатылымға шығарып, табысты арттыра отырып, несиеден құтылуымыз керек. Жетістікке жетудің бірден бір кілті – еңбексүйгіштікте. Қиындыққа мойымай алға қарай жүре берсе, адам дами береді, – деп қорытындылады ойын депутат.
Ерлан Мамырайханұлы сайлаушыларын өз кеңсесінде кез келген уақытта қабылдауға дайын. Ал «Нұр Отан» партиясы Шымкент филиалының кеңсесінде халықты қабылдау кестесі әр айдың екінші сәрсенбісі, сағат 16:00-ден 18:00-ге дейінгі аралықта өтеді.

Шымкент қалалық қоғамдық кеңес мүшелері мектеп асханаларына мониторинг жүргізу жұмыстарын қорытындылады.

– Оқу жылының аяқталуына байланысты мектеп асханалары өз жұмысын тоқтатады. Сондықтан біз де бүгінге дейінгі жұмыстарды қорытындылап отырмыз. Мониторинг барысында бірқатар мектеп басшылары өз өтінішін жеткізді. Ал қоғамдық кеңес тарапынан біз де кәсіпкерлер мен мектеп басшыларына ұсынысымызды айттық. Кей мәселелерді қалалық әкімдік, қалалық мәслихат депутаттары және білім бөлімімен бірлесе отырып шешу қажет, – деді қоғамдық кеңес төрағасы М.Битеміров.
БАҚ өкілдерімен өткен жиында қалалық мәслихаттың депутаты Н.Бұхарбаев асханалық қызмет көрсететін кәсіпкерлер жайлы бір шикіліктің шетін шығарды.
– Біз қызығы, мониторинг барысында мектеп асханасында қызмет көрсету бойынша тапсырыс алған 1 ғана кәсіпкер бірнеше мектепте қызмет көрсетуді ұтып алған. Бірақ, сол мектептің бәріне өзі қызмет етпей, білім бөлімі талапқа сай келмейді деп тапқан жеке кәсіпкерлерге жалға беріп отырған. Бұл дұрыс емес. Келісім-шарт кіммен түзілсе, сол кәсіпкер қызмет көрсетуі шарт. Жалға беруге мүлде болмайды. Балалардың дұрыс тамақтануынан пайда табуды қалай жоғары қоюға болады? – деді Н.Бұхарбаев.
Қалалық білім бөлімі басшысының орынбасары Ғабит Нысанов та бұл ақпаратты растады.
– Жаңа оқу жылында мұндай әрекеттерге жол бермеудің жолдарын қарастырамыз. Қазіргі тәртіп бойынша асхана қызметіне мектеп директоры да араласа алмайды, – деді ол.
Мұхтар Битеміровтың айтуынша, мониторинг жүргізіліп үлгермеген мектеп асханаларындағы жағдайды нақтылап, не қажет, не бар, не жоғын түгендеп, тізімін тапсыру директорларға жүктелген. Мұндағы мақсат – қыркүйек айына дейін мектеп асханасындағы қол жууға арналған орындар, орындықтар, тоңазытқыш, тағы басқа қажеттіліктерге қаражат бөлуді ұйымдастыру. Осылайша жазғы маусымда бірқатар қажеттіліктердің орны толса, күзде жаңа оқу жылы басталып, мектеп асханалары қызметін бастағанда мониторинг жүргізу жұмыстары қайта жалғаспақ.

Мегаполистің басты талабы – қала орталығы мен шет аймақтағы тұрғын алаптарындағы халықтың тұрмыс-тіршілігінде, инфрақұрылымдық жүйесінде айтарлықтай айырмашылық болмауы тиіс. Сондықтан да Шымкент қаласының аумағына енген елдімекендердегі өзекті мәселелер күн тәртібінен түспейді.

Қала аумағына 2014 жылы енген Тұрдыабад елдімекенінің тұрғындары ауызсуға зәру. Жақында Еңбекші ауданына қарасты елдімекен тұрғындары БАҚ өкілдерін шақырып, арыз-шағым айтты. «Ауылымызды Шымкентке қосқанда ең әуелі коммуналды сұрақтар тез шешімін табады деп қуанғанбыз» дейді ауыл биі Розмат Рызаев.
– Алайда, «Тұрдыабадқа ауызсу тартылады» деп басталған жұмыстар дәл қазір тоқтап тұр. Жаз маусымы басталғаннан су қажеттілігі екі есеге артады. Ал біз әлі күнге 60 тонналық цистернаға су жинап ішеміз. Соның зардабынан балалардың іші ауырады. Электр жарығы болмай қалса, цистернадағы суға да жете алмай қаламыз, – дейді тұрғын.
Мәселенің мән-жайын білу үшін бұрғылау жұмыстары жүріп жатқан құрылыс алаңына бардық. Мердігер – алматылық «ПК Геотерм» ЖШС екен. Бұрғылау шебері Серік Малдыбаев тапсырыс берушілердің жоспарына сәйкес 50 метр тереңдікте ұңғыма бұрғылау жұмыстары аяқталғанын айтты.
– Бұған дейін Оңтүстік Қазақстан облысының энергетика және тұрғын үй-коммуналды шаруашылық басқармасының тапсырысына сәйкес Базарқақпа, Өтеміс елдімекендерінде бұрғылау жұмыстарын аяқтадық. Базарқақпада 80 метр қазылған соң су шықты, қазір секундына 12 литр су беріп тұр. Ал Өтеміс елдімекеніндегі ұңғыманы қазу барысында тасты жердің қаттылығынан бұрғылау жұмыстары ұзақ уақытқа созылды. Қазір ол жақта да 135 метр тереңдіктен секундына 3 литр ауызсу шығып тұр, – дейді С.Малдыбаев.
Оның айтуынша, Тұрдыабад елдімекенінде 25 метрге дейінгі бұрғылау жұмыстарын 2 тәулікте аяқтаса, одан кейін тасты бөліктің жұмыстары қиындап, тәулігіне 1 метр ғана тереңдетіп отырған. Қазір 50 метр тереңдікте қазылған ұңғымада су жоқ. Ары қарай тек тапсырыс бойынша жұмысқа кіріспек. Осы орайда Оңтүстік Қазақстан облысының энергетика және тұрғын үй-коммуналды шаруашылық басқармасының басшысы М.Зұлхарнайұлына хабарласып, ауызсумен қамту жұмыстарының «тоқтап қалмағанын» білдік. Бұл жобаға жетекшілік ететін басқарманың бас маманы Асылбек Құрманбеков тақырыптың түйінін тарқатып, түсіндіріп берді.
– Тұрдыабад елдімекенінің жер асты су қорын бекіту жобасы «Өңірлерді дамытудың 2020 жылға дейінгі бағдарламасы» аясында жүзеге асырылуда. 2018 жылдың сәуір айында басталған жоба бойынша алғашқы тереңдік 50 метр деп бекітілген. Қазір осы тереңдікке темір құбырлар отырғызылды. Сондай-ақ, ұңғыманы саз балшықтан тазалау мақсатында деглинизация жасалып, сулы қабаттың су беру және су өткізгіштігі қалпына келтірілді. Ендігі кезекте тәжірибелік-сүзгілеу шаралары қолға алынады. Жоба бойынша іздеу-барлау жұмыстары 2019 жылдың соңына дейін жүргізіледі деп жоспарланған, – деді маман.
Ендеше, тұрғындарға әлі де күтуге тура келіп тұр.