Жергiлiктi полиция қызметiне үмiткерлер таңдалды
Среда, 03 Февраль 2016 05:31
Сессияда баяндама жасаған ОҚО әкімдігінің бас инспекторы Шоқан Қоңырбаев Шымкент қалалық ішкі істер басқармасының жергілікті полиция бөлімінің бастығы лауазымына үміткерлерді ұсынды. Шымкент қалалық ішкі істер басқармасының жергілікті әкімшілік полиция қызметінің бастығы лауазымына полиция подполковнигі Мейрхан Данияр Мейрханұлы үміткер деп танылды. Ал Абай ауданы полиция бөлімінің бастығы лауазымына полиция майоры Арыстанбеков Руслан Бектайұлы, Әл-Фараби ПБ бастығы лауазымына полиция полковнигі Кенжебаев Ерғали Мамырұлы,
Еңбекші ПБ бастығы лауазымына полиция подполковнигі Серікбай Бегалы Серікбайұлы, Қаратау ПБ бастығы лауазымына полиция майоры Жұманов Сейдалы Оразалыұлы ұсынылды. Депутаттар жергілікті полиция бөлімі бастығына ұсынылған үміткерлерді бірауыздан қолдады.
– Бүгін біз маңызды шешім қабылдап жатырмыз, – деді қала әкімі Ғабидолла Әбдірахымов. – Қаладағы экономика саласындағы мәселелерден бөлек, халықтың қауіпсіздігі өте маңызды. Елбасы Н. Назарбаевтың Ұлт жоспары – бес институционалдық реформасын іске асыру жөніндегі 100 нақты қадамының 30 және 31-қадамдарында жергілікті полиция қызметін құру керектігі туралы тапсырма жүктегені белгілі. Осы уақытқа дейін ішкі істер саласында біраз жұмыстар атқарылды. Енді бұл жұмысты ары қарай жандандырып, биік деңгейге көтеруіміз қажет. Биыл қазына қаржысынан қомақты қаражат бөлінді. Жол инспекторларына жаңадан көлік алынып, бейнебақылаулар қойылып, техникалық базасы нығайтылады.
Шымкенттiк фотографтың жұмысы «Экспо-2017» көрмесiне қойылады
Пятница, 29 Январь 2016 06:42Бұдан біраз уақыт бұрын республикалық «Тарихи фотосуреттер» фотобайқауында шымкенттік фотограф Мақсат Шағырбаевтың жеңімпаз болғанын қуана хабарлаған болатынбыз. Енді Астана қаласында салтанатты марапаттау рәсімі өткізіліп, жеңімпаз атанған фотографтардың көрмесі ұйымдастырылды.
Фотобайқау «Қазақ хандығының 550 жылдығы», «Жеңістің 70 жылдығы», «ҚР Конституциясының 20 жылдығы» және «Қазақстан халықтары Ассамблеясының 20 жылдығына» арналған болатын. Байқауға барлығы 27 фотограф өз жұмысын ұсыныпты.
– Өткен жыл айтулы даталарға толы жыл болды. Осыған орай біз республикалық фотобайқау жарияладық. Бұл байқау белгілі бір тақырып аясымен шектеліп қалған жоқ, мұнда Қазақстанның тыныс-тіршілігі жан-жақты қамтылып, қас-қағым сәттердің барлығы фототарихқа айналды, – деді Ұлттық музей директоры Дархан Мыңбай.
Сондай-ақ, қазылар алқасының шешімімен «Қазақ хандығының 550 жылдығы» аталымында топ жарған Назарбаев университетінің әкімшілік қызметкері, әуесқой фотограф Қанат Нұртазинге, «Жеңістің 70 жылдығы» аталымы бойынша үздік шыққан Петропавл қаласындағы «Солтүстік Қазақстан» баспаханасының фототілшісі, кәсіпқой фотограф Вадим Мударисовқа, ал «Конституцияның 20 жылдығы» және «Қазақстан халқы Ассамблеясының 20 жылдығы» аталымы бойынша жеңімпаз атанған кәсіпқой фотограф Мақсат Шағырбаевқа «Алғыс хат» пен қомақты қаржылай сыйақы табыс етілді.
– Астана қаласында өткен бұл байқаудың жөні бөлек. Көрген көзге ұлттық құндылықтарды елестететін, қазақы түс алған көрменің келешек ұрпаққа берері мол екеніне күмән жоқ. Елбасы Н.Назарбаевтың
бастамасымен жүзеге асып, құрлықтардың басын қосып жатқан «Экспо-2017» халықаралық көрмесіне еліміздің мәдениеті мен ұлттық құндылықтармен әрленген шығармашылық еңбегіммен әлем елдері туристерінің назарын аударуға барынша атсалысамын, – дейді
Мақсат Шағырбаев.
Айта кетейік, жеңімпаз фотографтардың өзге де туындыларын 22 ақпанға дейін Ұлттық музейден тамашалауға болады.
Әйгерім БЕГІМБЕТ
Жүйелі жұмыс жалғасады
Пятница, 22 Январь 2016 07:20
Бұл ауданның басқа аудандардан ерекшелігі сол, қалаға қосылған жаңа елді мекендерден құралған. Соған орай түйіні тарқатылмай кезек күтіп тұрған мәселелер бар. Ауызсу, жол, табиғи газ, жарық, мектеп, балабақша, қоғамдық көлік секілді қажеттіліктер әрбір тұрғынды мазалайды.
– Үш ауысымда білім беретін мектептер санын жою мақсатында Мирас тұрғын алабында 900 орынды, «Бозарық» шағынауданында 1200 орынды мектеп салынуда, ал Тассай тұрғын алабындағы №91 мектепте және Сайрам тұрғын алабында №111 мектепте 300 орынды қосымша құрылыс жүргізілуде. Бұл мектептердің барлығы биыл пайдалануға беріледі, – деді Ғалым Исмаилов.
Бұдан бөлек «Бозарық» пен «Нұртас» шағынауданында 320 орынды балабақшаның құрылысы жүргізілуде екен. Бұл жаңалық балабақша кезегінде тұрған тұрғындарды бір қуантты.
Сондай-ақ, әкім елді мекендердің ішкі орамдық көшелерін асфальттау мақсатында 63 көшенің жобалық-сметалық құжаты әзірленіп, бюджетке ұсынылғанын, ал 42 көшенің жобалық сметалық құжаттары әзірленіп жатқанын жеткізді. Әкімнің баяндамасынан кейін тұрғындар сұрақты қарша жаудырды. Басқосуда сөз алған «Ақжайықтың» орам басқарушысы Б. Балтабеков:
– Бұрын әкімдерді шақырып келтіре алмайтынбыз, ал Қаратау ауданына қосылғалы шағынауданымыздың шырайы кіріп қалды. Ғалым
Ыбырайұлы да жиі келіп, халықтың мұң-мұқтажын тыңдайды. Неше жылдан бері сусыз отырған бізге ауызсу келді. Табиғи газ да келіп тұр. Енді әрбір тұрғын құбырмен тартса болды. Тағы бір тілегіміз – жолдарымыз асфальтталып, емдеу мекемесі салынса екен, – деп өтінішін білдірді.
Тұрғындардың тілегі, өтініші, мәселесі ортақ. Көпті толғандырған сан сауалға аудан әкімі Ғалым Исмаилов пен сала басшылары жауап берді.
– Біз сіздермен жыл бойы өтініштеріңіздің жай-күйіне қарай, жауапты сала басшыларын шақырып, мәселені бірге талқыладық, бірге шештік. Ары қарай да жұмысты дәл осылай жалғастыратын боламыз, – деді
Ғалым Исмаилов.
Басқосуды қорытындылаған қала әкімінің орынбасары Нұралхан Көшеров бұл мәселелердің бәрі бір күнде шешіле салмайтынын, кезең-кезеңімен орындалғанша түсіністік танытуларын сұрады. Сондай-ақ, әр ауылдың төбе билерімен апта сайын өтетін кездесуге өзі де қатысып, түрлі мәселе төңірегінде кеңесетін болып тарқасты.
Қаратауда аз уақытта ауқымды жұмыс атқарылды
Среда, 20 Январь 2016 06:41Қаратау ауданының әкімі Ғалым Исмаиловтың жылдық есебін тыңдап, талап-тілегін жеткізу үшін қалаға қосылған «Бозарық», «Тассай», «Таскен», «Тұран» тағы басқа тұрғын алаптың тұрғындары №72 жалпы орта мектепке көптеп жиналды. Құрылғанына бір жылдың жүзі енді болған Қаратау ауданында атқарылған жұмыстармен қатар тұрғындарды мазалаған түйткілді мәселелер де аз емес. Бүгінде ауданда 213 мыңнан астам халық тұрады. Олардың басым көпшілігін мазалайтын мәселе – ауызсу, табиғи газ, жарық, жол, қоғамдық көлік болып тұр. Басқосуда аудан әкімі Ғалым Исмаилов халықтың әл-ауқатын жақсарту бағытында тындырылған істерге талдау жасап, есеп берді. Кемшіліктерді саралады. Екі сағаттан астам уақытқа жалғасқан кездесуде тұрғындардың тарапынан қойылған сұрақтың 80 пайызы коммуналдық салаға қатысты болды.
Қаратау ауданына 17 шағынаудан мен 13 тұрғын алап енген. Әкімдік қызметкерлері қоқыс тастау мәселесін бірінші қолға алыпты. Әрбір тұрғынмен жеке сөйлесіп, қоқыс шығаратын мекемемен келісімшартқа тұру қажеттілігін түсіндірген.
– Сәуір айында қатты тұрмыстық қалдықтарды шығарумен айналысатын мекемелермен тұрғындардың келісім-шарт түзу көрсеткіші 25% ғана болса, қазіргі таңда бұл көрсеткіш 86% жетті. Осылайша, тазалық мәселесі біршама реттеліп, тұрғындар кез келген жерге бей-берекет қоқыс шашпайтын болды. Бұдан бөлек, қоқыс полигонына 7157 шаршы метр қоқыс шығарылды, – деді Ғалым Исмаилов.
Бүгінде ішкі орамдық жолдар мен аулаларды санитарлық тазалау мақсатында 10 аумаққа бөлініп, оған аудан әкімі аппаратының жауапты мамандары бекітілген. Аудан тұрғындарының тазалық мәселесіне жауапты қарай бастағанын жеткізген Ғалым Ыбырайұлы әлі де табиғатқа жанашырлық танытуға шақырды.
Басқосуда жиі көтерілген мәселенің бірі – ауызсу. Былтыр «Қайнарбұлақ» саяжайы, «Ақжайық», «Нұртас» шағынаудандарында және Сайрам тұрғын алабы тұрғындарына ауызсу берілсе, «Қайтпас» пен «Мирас» шағынаудандарында құрылыс жұмыстары жүруде. Аудан әкімі қалған ауылдарда бұл мәселе кезең-кезеңімен біртіндеп шешілетінін жеткізді. Екінші мәселе – табиғи газ. Аудан бойынша жалпы 40 мыңнан астам тұрғын үйдің 27 мыңға жуығы табиғи газбен қамтылған.
«Ақжайық» шағынауданында ішкі орамдық газ жүйелерін жүргізуге бюджеттен қаржы бөлініп, бұл мәселе шешімін тапты, ал Таскен тұрғын алабы мен «Мирас» шағынауданын табиғи газбен қамту үшін жұмыстар атқарылуда. «Осы жылы тұрғындар көмір тасып, күл шығарудан құтылады», – дейді әкім.
Ал үшінші мәселе – электр жарығы. «Ақжайық», «Қайтпас», «Достық-2» шағынаудандарды электр жүйесімен қамту үшін қазынадан қаржы бөлініп, бүгінде жұмыстар жүргізілуде. Жыл соңына дейін тұрғындар қазіргі сығырайған жарықпен қош айтысады. Сондай-ақ, Қайнарбұлақ тұрғын алабы Жаңақұрылыс аумағына демеушілер есебінен электр трансформаторлары орнатылып, бағаналар мен электр сымдары тартылса, Қайнарбұлақ саяжайының тұрғындары сапалы жарыққа қол жеткізген.
– Аудан тұрғындарын электр жарығымен қамтамасыз етіп отырған 500-ге жуық трансформатордың 200-ден астамы жекеменшік иелігінде. Біраз уақыт бұрын «Оңтүстік Жарық Транзит» ЖШС-нің басшысы Мұрат Ибрагимовке өтініш айттық. Ол халықтың мұқтажын түсініп, жеке өзінің есебінен Қайнарбұлақ тұрғын алабының жаңа құрылысына екі трансформаторды апарып қойды. Сондай-ақ басқа жекеменшік трасформаторлар бұзылып қалған жағдайда қолдау танытуда, – деді аудан әкімі.
«Қайнарбұлақтан» босаған трансформатор жарыққа зәру өзге ауылға орнатылатынын айтып, тұрғындарды қуантты.
2015 жылы ауданның 32 көшесіне күрделі және орта жөндеу жұмыстары жүргізіліп, 40 шақырым асфальт жол жөнделген. Мәртөбе тұрғын алабында 3 көше, «Тассай» шағынауданда 11 көше, Сайрам тұрғын алабында 11 көше, «Достық» шағынауданында 3 көше, Қызылсай тұрғын алабында 3 көше, Таскен тұрғын алабында – 1 көшеге асфальт төселіп, тұрғындар тақтайдай тегіс жолдармен жүріп өтеді. Сондай-ақ, кәсіпкерлердің қолдауымен 15 көшеге шағал тас төселген.
Осылайша аудан әкімі
Ғалым Исмаилов алғаш рет берген жылдық есебінде атқарылған жетістіктер мен кемшіліктерді тізіп шықты. Одан кейін кезек жарыссөзге келіп, қалалық мәслихат депутаты Төреайым Сұлтанова, аудандық ардагерлер кеңесінің төрағасы Айтжан Шоланов, «Шымкент тас» ЖШС-нің басшысы Мұхиддин Абдуллаев, «СпецКомплектСервис» ЖШС-нің басшысы Жұмабек Исмаилов, т.б. азаматтар аудан әкімі Ғалым Ыбырайұлы мен қызметкерлерінің жұмысына оң баға берді.
Сұрақ-жауап бөліміне ойысқанда, Тассай тұрғын алабының орам басқарушысы Т. Мәдібеков 16 көшеге асфальт жол салынып, тазалық жұмыстарының қалыпқа келгеніне алғыс айтып, енді емдеу орталығы мен спорт кешені бой көтерсе екен деген тілегін жеткізді. Ал Т. Досжанов жақында ғана әкімшілік-іскерлік орталықтан жаңадан берілген баспаналардың бірінен пәтер кілті бұйырғанын, десе де тұрғындардың толық көшіп келмеуіне байланысты табиғи газ берілмегенін, суық үйде бүрсеңдеп отырғандарын тілге тиек етті. Сондай-ақ, қоғамдық көлік мәселесін шешіп, қоқыс жәшігін орнатып беруін сұранды.
Бұдан бөлек басқосуда тұрғындар мектеп, балабақша, қоғамдық көлік, жер дауы, ретсіз сауда мәселесін алға тартты. Әр сұраққа жеке-жеке тоқталған аудан әкімі күрмеуі қиын мәселелердің барлығы 2018 жылға дейін ретке келеді деп жоспарлап отырғанын жеткізді. Екі сағаттан астам уақытқа созылған басқосуды қала әкімінің орынбасары Бейсенбек Жанбосынов қорытындылап, құрылғанына бар-жоғы бір жыл болған ауданда шатқаяқтап тұрған біраз шаруа шешіліп, аудан әкімдігі қызметкерлері халықтың сеніміне ие болып үлгергендіктерін айтты. Ал жиналған көпшілік болса ауданның жағдайы әлдеқайда жақсарғанына ризашылықтарын білдірді.
6 нысан заң талаптарын бұзған
Пятница, 15 Январь 2016 05:33Шымкенттегі Темірлан тас жолы бойында 6 нысанның заңсыз салынғаны белгілі болды. Бұған Шымкент қаласы әкімдігі кәсіпкерлік бөлімі мен мемлекеттік сәулет және құрылыс бақылау басқармасының бірлесе ұйымдастырған рейдтік іс-шарасында көз жеткіздік. Рейд барысында Темірлан тас жолы мен Адырбеков көшесінде орналасқан заңсыз нысанның иелерімен кездесіп, оларға тиісті шара қолданылды.
 |
 |
– Қараша айынан бастап облыс әкімі Бейбіт Атамқұловтың тапсырмасы негізінде құрылыс талаптары мен заң нормаларын сақтамаған азаматтарға шара көру мақсатында рейд жұмыстары өткізіліп жатыр. Нәтижесінде Темірлан тас жолы бойында 33 нысан зерттеліп, оның 6-уы құрылыс заң талаптарын бұзғаны анықталған. Сотқа ұсыныс беріліп, қазіргі таңда бұл мәселе қаралып жатыр. Олар жерді үй салу үшін алып, коммерциялық мақсатқа пайдаланған – дейді сәулет және құрылыс бақылау басқармасының бас маманы Керімхан Шанбаев.
Бұдан бөлек басқарма мамандары мемлекеттік құрылыс нормалары мен талаптарын сақтамаған 4 нысанның иелерін сотқа берген. Оның біреуіне жақында шешім шығыпты. Заңды өрескел бұзған азаматтың иелігіндегі нысан сүріліп тасталмақ.
Тұрғындар қауіпсіз орынға көшiрiлдi
Среда, 13 Январь 2016 06:02Жақында «Оңтүстiк» шағынауданындағы (Чапаевка) Деповская көшесі №21 үйдің ауласында кәрiз коллекторы жарылған болатын. Салдарынан жер опырылып, диаметрi 2х2 метрдi құрайтын шұңқырлар пайда болған. Осы оқиғаға байланысты Шымкент қаласы әкiмiнiң орынбасары Б.Жанбосынов пен қалалық төтенше жағдайлар басқармасы басшысының орынбасары Е.Сарыбаев БАҚ өкiлдерiн жинап, брифинг ұйымдастырды.
– 1964 жылы салынған бұл коллектордың тозығы әбден жеткен болатын. Оның үстіне толассыз жауған нөсер жауын да әсер етті. Төтенше жағдай хабарланғаннан кейін арнайы мамандар дереу іске кірісті. Шұңқырлар бекітіліп, екi отбасы басқа жаққа көшiрiлдi. Сондай-ақ, Шымкент қаласы әкiмдiгiнде төтенше жағдайдың алдын алу мәселесi бойынша комиссия отырысы өткiзiлiп, тиісті шешiм қабылданды. Ешкім зардап шеккен жоқ, – дедi Б. Жанбосынов.
Айта кетейік, жедел құрылған комиссия аталған аумақтың оң жақ бөлiгiндегi 115 нысан орналасқанын, оның 70-i санитарлық қорғаныс аймағын бұзғанын анықтаған. 24-i тұрғын үй. Ал, сол жақ бөлігінде 90 нысанның 50-і санитарлық қорғаныс аймақты бұзған. Оның 20-ы тұрғын үй.
Брифингте Б.Жанбосынов қаладағы 250 шақырымдық кәрiз жүйесі мен 728 шақырымдық су жүйесін күрделi жөндеуден өткiзу керектігін, бұл жұмыстар кезең-кезеңiмен іске асып, 2029 жылы ғана толық аяқталатынын жеткізді.
Білім беру: бағындырған белестер бар
Среда, 30 Декабрь 2015 05:29Санаулы сәттен соң 2016 жыл есігімізді қаққалы тұр. Тарих қойнауына аттанғалы тұрған қой жылында Шымкент қаласының білім саласында қандай нәтижелерге қол жетті? Қандай өзгерістер орын алды? Бұл ретте Шымкент қалалық білім беру бөлімінің жыл бойы атқарған жұмыстарының негізгілерін саралап көрген едік.
81 түлек «Алтын белгiге» лайықты
Түлектердің төрт ұйқысын төрт бөлген Ұлттық бірыңғай тест 2-8 маусым аралығында 3 тестілеу пункте өткізілді. 6519 шымкенттік мектеп бітірушінің 3921-і білім бәйгесіне қатысуға ниет білдірген. Ал республикалық, халықаралық ғылыми жоба байқауларына қатысып, жеңімпаз болған 25 оқушы ҰБТ-дан босатылды. Мектеп бітірушілердің жыл бойы мазасын қашырған айтулы сынақ көзді ашып-жұмғанша өте шықты. Тест тапсырғандардың орташа балы - 81,8-ді құрады. «Алтын белгіге» үміткер 155 оқушының 81-і өз білімін дәлелдеп шыға алды. Соның ішінде облыс орталығы Шымқаладағы №113, №42, №48, №107, №90 мектептің оқушылары жоғары балл жинап, ұстаз бен ата-ана сенімін ақтады.
«Балапан» үмiттi ақтады
Бүлдіршіндер мен олардың ата-аналарын қуанышқа кенелткен бағдарламалардың бірі – «Балапан». Бүгінде осы бағдарлама бойынша қаламызда 45 мыңнан астам бүлдіршін балабақшамен қамтылып отыр. Биыл қаладағы «Самал» шағынауданында - «Самал», «Тұлпар» шағынауданында - «Тұлпар» мен №57 «Хадиша» балабақшалары пайдалануға берілді. Мектепке дейінгі мекемелердің әрқайсысы 320 балаға лайықталған. Сондай-ақ, қой жылында Шымкентте №9 «Аққанатпен» пен Гаражная көшесіндегі 80 орынды балабақша да бүлдіршіндерге есігін айқара ашты. Балалардың шат күлкісіне толы мекеннің ойын бөлмесі, музыка залы, салауатты өмір салтын қалыптастыруға арналған спорт залы, асхана және тағы да басқа қазіргі заман талабына сай бөлмелері қарастырылған. Одан өзге биыл 7 балабақшаға 857 млн теңге бөлінді. Нәтижесінде №24, №41, №69, №70, №75, №97, №118 балабақшалары күрделі жөндеу жұмыстарынан өтті. Бүгінде қаламызда 84 мемлекеттік балабақшада 23 мыңнан астам бүлдіршін тәрбиеленуде.Ал 21 мыңнан астамы жекеменшік балабақшаға, 2 мыңнан астамы мектеп жанынан құрылған шағын орталықтарға барып жүр. Десе де қалада демографиялық ахуал қарқынды түрде өсіп жатқандықтан әлі де 46 мыңнан астам бүлдіршін балабақша кезегінде тұр. Жоспар бойынша 2020 жылға дейін «Балапан» бағдарламасы аясында кезекте тұрған бүлдіршіндер 100 пайыз балабақшамен қамтылады.
Үш ауысымды мектептер 2017 жылы шешiмiн табады
Биыл «Ақтас-2» тұрғын алабында – 200, «Көкбұлақ» тұрғын алабында – 300, «Сайрам» тұрғын алабында 1200 оқушыға арналған мектеп жаңадан пайдалануға берілді. Сондай-ақ, Қорқыт ата атындағы №22 негізгі орта мектеп және №94 жалпы орта мектеп жанынан қосымша құрылыс салынды. Ал №21, №25, №41, №43, № 44, №65 мектепке күрделі жөндеу жұмыстары жүргізілді. Биыл төрт мектеп апатты жағдайда деп танылған болатын. Нәтижесінде №36, №118 мектептердің қосымша құрылыс салынды, ал №12, №34 мектептерде қайта құру жұмыстары арқылы бұл мәселе шешімін тапты.
Айтпақшы, биыл қаладағы 126 мектепте қоңырау сыңғыры естілді. Онда 147 мыңнан астам оқушы оқып жатыр. Оларға 16 мыңнан астам ұстаз дәріс береді. Ерекше қуанышты жаңалық, 2017 жылы үш ауысымды мектептердің мәселесі шешімін табады.
Бiлiмпаз бала – болашаµымыз
Биыл Шымкенттік оқушылар республикалық, халықаралық білім додаларында топ жарып, биіктен көрініп, жақсы нәтиже көрсете білді. Айталық, Ы.Алтынсарин атындағы №65 мектеп-гимназиясының 3-сынып оқушысы Оразалы Ілияс пен 9-сынып оқушысы Әбілхан Диана, 4-сынып оқушысы Арсен Әділет Венгрияның Будапешт қаласында өткен халықаралық математикалық пән олимпиадасының жеңімпаздары атанды. Бұдан бөлек дәл осы мектептің 10-сынып оқушысы Дархан Мамырбеков ХІІ Республикалық Өнертапқыштар «Шапағат - 2015» сайысының жеңімпазы атанып, дүниежүзілік зияткерлік меншіктің олжасымен «Ең үздік өнертапқыш оқушы» номинациясына ие болды. Астана қаласында өткен «ZIAT» «Ғылым шарайнасы» атты республикалық ғылыми жоба байқауында аталған білім ұясының 10-сынып оқушылары Мәди Оңғар ІІІ-орын, Әлишер Зүлмат ІІ-орын, 11-сынып оқушылары Бибінұр Оңғар ІІ-орын, Әділет Қуанышбек І-орынды жеңіп алды. Ал шығармашыл, ізденімпаз мұғалімдер арасында №13, №47, №65, №85, №90 мектеп ұстаздарының озық іс-тәжірибелері облыстық деңгейде таратылып, авторлық бағдарламалары жарық көрді. Міне, Шымкенттегі білім саласы қызметкерлері осылайша жылды жемісті аяқтап отыр. Оқушылардың бағындырған белестері бір төбе. Мұның бәрі білікті ұстаздың арқасы екені белгілі. «Білімді жас – жарқын болашақтың кепілі» демекші, елдің ертеңгі тізгінін ұстайтын бүгінгі жас ұрпақ алдағы уақытта да білімпаз боларына сенім артамыз.
Жылдың ең үздік жастары
Среда, 30 Декабрь 2015 04:19Облыстық опера және балет театрында 2015 жылдың түрлі саладағы жас көшбасшылары анықталып, марапатталды. Қала әкімінің «Үздік» жастар премиясы биыл «Үздік жас құқық қорғаушысы», «Үздік жас кәсіпкер», «Үздік жас көшбасшы», «Үздік жас студент», «Үздік жас спортшы», «Үздік жас баспасөз тілшісі» және тағы басқа 24 номинация бойынша үлестірілді.
Дәстүрлі түрде ұйымдастырылатын шараға қала әкімінің орынбасары Қайрат Нұртай мен қалалық мәслихаттың хатшысы Нұрлан Бекназаров қатысып, жеңімпаздарға арнайы диплом мен бағалы сыйлық тапсырды.
– Шымкент – жастардың қаласы. Біздің қаламызда 240 мыңнан астам жас бар. Қаланың қоғамдық-саяси өміріне белсенді араласып, үлес қосып, түрлі салалар бойынша жетістіктерге жеткен жастарға Шымкент қаласы әкімінің «Үздік» жастар премиясы биыл бесінші рет тапсырылып отыр. Ел ертеңі саналатын жастарға артылатын жауапкершіліктің жүгі салмақты. Біз сендерге сенеміз, – деді Қайрат Нұртай.
Марапатталғандар арасында әріптесіміз Әйгерім Бегімбет те бар. Ол «Үздік жас баспасөз тілшісі» номинациясының иегері атанды. Журналистика саласында жүріп, түрлі тақырыпқа қалам тартатын ол соңғы жылдары үздік фотосуреттерімен де көзге түсіп жүр. Әріптесімізге әрқашан қанатың талмасын деген тілек білдіреміз!