Кеше Үкімет үйінде ҚР Министрлер Кабинеті жаңа құрамда алғашқы отырысын өткізді.

Жиын барысында Премьер-Министр Асқар Мамин ҚР Президентінің Жарлығымен тағайындалған министрлерді таныстырды. Үкімет басшысы Елбасы Жарлығымен кейбір мемлекеттік органдар қайта құрылғанын еске салды. «Мемлекет басшысы бізге үлкен сенім артып отыр, бұл зор жауапкершілік. Сондықтан сол сенімді ақтауымыз керек.

Үкіметтің жаңа құрамы айқын нәтижелерге бағдар алған нақты істер Үкіметіне айналуы тиіс. Мемлекет басшысы еліміздің әлеуметтік және экономикалық дамуын жаңа сапалы деңгейге шығару, халықтың табысы мен тұрмыс деңгейін арттыру, тиімді жаңа жұмыс орындарын құру, шағын және орта бизнесті дамыту бойынша бірінші кезектегі міндеттерді қойып отыр.

Осындай нақты шаралардың нәтижесінде халықтың әл-ауқатын арттыра аламыз», - деді А. Мамин.
Сонымен қатар Премьер-Министр «Нұр Отан» партиясының съезінде халықты әлеуметтік қолдауды күшейту және жұртшылықтың тұрмыс сапасын арттыру бойынша бірқатар жаңа іс-шаралар жарияланатынын атап өтті.

Айта кетейік, Астанада «Нұр Отан» партиясының XVIII Съезі басталды. Жиынға Шымкенттен 60 делегат аттанған. Олардың арасында партия мүшелері, депутаттар, қоғам қайраткерлері бар.