Қасиетті Рамазан айындағы қайырымды істер жалғасуда. Сондай іс-шараның бірі Nur Otan партиясының ұйытқы болуымен Еңбекші ауданы аумағында өтті. Онда 500-ден астам отбасыға азық-түлік таратылды. Қайырымдылық ісіне Шымкент қаласы мәслихатының депутаты Бәйкен Әшірбаев демеушілік етті.
– Қазір қала аумағында қала әкімінің бастамасымен «Рамазан – қайырымдылық айы» акциясы жүріп жатыр. Осы қаланың тумасы ретінде өз үлесімізді қосып, көмек көрсетуді жөн көрдік. Қандай іс-шара болса да елдегі ауызбіршіліктің нәтижесінде ұйымдастырылатынын ұмытпаймыз. Бірге болсақ, барлық қиындықты жеңіп шығамыз, - деді Бәйкен Әшірбаев.
Партия өкілдерінің айтуынша, тұрғындардың өтініші ескеріле отырып, кәсіпкер азаматтарға ұсыныс жасалып, отбасыларға көмек берілуде.
– «Бұған қоса «Бақытты отбасы», «Халыққа көмек», «Ардагерлерді ардақтайық», «Кедергісіз келешек», «Құтты мекен» партиялық жобалары жүзеге асырылуда», - деді Nur Otan партиясы Еңбекші аудандық филиалы төрағасының бірінші орынбасары Жандос Қамбарбеков.
Осылайша Еңбекші және Қаратау ауданына қарасты Қаратөбе, Жұлдыз, Сайрам елдімекендерінің тұрғындарына бірінші қажеттіліктегі азық-түліктер таратылып, отбасыларға үлестіріледі.
