– Мұндағы мақсатымыз – пиротехникалық заттарды қолдану барысында жазатайым оқиғалардың алдын алу. Кешенді іс-шаралар 2 кезеңде атқарылады. Бірінші кезекте қаладағы көпшілік орындарда тұрғындарға қауіпсіздікті сақтау туралы насихат жүргізіледі. Жыл басынан бері осы бағытта 8000-ға жуық адамды қамтыған 43 рейд, 2 дөңгелек үстел ұйымдастырылды, – деді азаматтық қорғау полковнигі.
Департамент мамандары екінші кезекте кәсіпкерлердің пиротехникалық заттарды сатуы мен сақтау тәртібіне бақылау жүргізеді. Атап айтқанда полицейлермен бірге пиротехникалық заттар сатылатын ірі сауда орындарына, базарларға рейдтер жүргізіледі. Айта кетейік, пиротехникалық заттарды сатушылардың лицензиясы болмаса немесе заттарды сақтау тәртібінде заң бұзушылықтар болған жағдайда полиция қызметкерлері тарапынан кәсіпкерге айыппұл салынып, пиротехника тәркіленеді.