Кездесуде «Еңбек» мемлекеттік бағдарламасының тиімділігі түсіндіріліп, «Жастар практикасы», «Әлеуметтік жұмыс» бағыттарына мемлекет есебінен ақылы жұмыстарға жұмыссыз азаматтарды жұмылдыру мақсатында келісім жүргізілді.
– Кәсіпорын толық қуатында жұмыс істеуі үшін саланың қыр-сырын білетін кәсіби кадрлар керек. Бүгінде мамандар аз, жұмысшылар келсе, үйретеміз, шеберлер бар. Өндіріс орнына тоқымашылар, тігіншілер, операторлар және дизайнерлер жетіспейді, – дейді кәсіпорын директоры Жанар Кушерова.
Техникалық мамандық иелерін кәсіпорынға тартуды көздеген тоқыма фабрикасының өкілдері мемлекеттік бағдарламаның тиімділігіне қызығушылық танытып, алдағы уақытта қажет мамандарды жұмыспен қамту орталығы арқылы жұмысқа орналастыруды жүзеге асырмақ.
«AZALA Textile» тоқыма фабрикасы қаладағы ең үлкен кәсіпорындарының бірі саналады. Компания сырттан шикізат сатып алмай, өз өнімімен өзін толық қамтамасыз етіп отыр. Мақта зауыты мен жіп, мата дайындау цехы толық қуаттылықпен жұмыс істеуде.
Қазіргі таңда «Оңтүстік» АЭА-да 25 жоба іске қосылып, жалпы 2293 жұмыс орны ашылған. Алдағы 2 жылда тағы 23 жоба іске қосылып, 2000-нан аса жұмыс орны ашылады деп жоспарлануда.
Айта кету керек, тоқыма фабрикасы үдемелі индустриялық-инновациялық даму бағдарламасы аясында жүзеге асырылған. Компания жеңіл тоқыма өнімдерін өндіреді, көрпе тыстары мен жастық, сүлгілер, ақжаймалар мен басқа да тұрмыстық жағдайға қажет бұйымдар шығарады. Сонымен қатар, еліміздегі тігін цехтарынан медициналық бетперде жасау үшін қазір фабриканың сапалы маталарына, бөздеріне сұраныс артқан. Кәсіпорын Шымкентпен қатар Нұр-Сұлтан, Алматы, Қарағанды, Ақтау қалаларынан тапсырыс алуда.