Фестивальге қала тұрғындары мен қонақтары, зиялы қауым өкілдері қатысты.
— Ұлтымыздың салт-дәстүрінің қай-қайсысын алсаңыз да керемет. «Қымызмұрындық» дәстүрін ұмытып кеттік деп айта алмаймыз. Иә, қолданыстан біршама шығып қалғанымен, тамыры иісі қазақтың тарихынан ажырамаған буынның көмегімен қайта жаңғырып отыр. Күні бүгінге дейін қымызмұрындық жер-жерде, ауылдарда тойланып жүр, - деді ҚР мәдениет қайраткері К.Айдарбекова.
Іс-шара қолөнершілер көрмесінен бастау алып, қымызмұрындық салтының «Биебау», «Биебайлар» жоралғыларына жалғасты. Орталық мамандары қымызды баптаудың түрлі әдіс-тәсілін ұсынып, келушілерге қымыз бен бауырсақ, құрт үлестірді. «Арқан тартыс», «Қол күрес», «Серке көтеру», «Сақа тарту», «Садақ ату» сынды ұлттық ойындар ойнатылды. Сайысқа қалалық мәдениет басқармасына қарасты 8 мекеменің командасы қатысып, жеңімпаздар жүлделі сыйлықтармен марапатталды.
Айта кетейік, қымызмұрындық Ұлыстың күні – Наурыздан кейінгі қазақтың ұлы тойы. Бұл – бие байлап, алғышқы қымыз ішу тойы және ынтымақ, еңбек бірліктің мерекесі. Мерекеде бие сүті қорланып, ашытылған соң екі-үш күн бойы жиналған қымызға ауыл ақсақалдары мен көрші-қолаң қымызмұрындыққа шақырылған.
Ботакөз ЕРМАХАНҚЫЗЫ