Шымкентте көпқабатты үйлерді сейсмонығайту жұмыстары кестеге сай жүруде. Қазіргі таңда көнерген үйлерді жөндеу басталып кетті. Жауапты мамандардың мәлімдеуінше, биыл қалада сейсмонығайту жұмыстары 7 үйде жүргізілмек.
Бұл мақсатта қазынадан 723 млн теңге қаржы бөлінген. Қазір Бауыржан Момышұлы даңғылындағы екі үйде құрылыс қарқын алған. Олардың қасбеттері жаңаланып, шатыры ауыстырылады, қабырғалары бекітіледі. Жалпы, 7 үйдегі құрылыс жұмыстарын 6 мердігер мекеме атқарады деп жоспарлануда. Айта кетейік, аталған жөндеу жұмыстарына көпқабатты үйдегі тұрғындардан қаржы жиналмаған. Құрылыс жергілікті бюджет тарапынан жүзеге асуда.
Еске сала кетсек, бұл 7 тұрғын үйден бөлек қаладағы 90 көпқабатты үй жөндеу жұмыстарын қажет етеді. Қазір онда сейсмикалық зерттеу жұмыстары басталды.