Елімізде фармацевтика саласында көшбасшыға айналған «Химфарм» зауыты жаңа цехын іске қосты. Енді кәсіпорын антибиотик ұнтақтарын асептикалық жолмен бөліп шығарады.
Жаңа цехтың ашылу салтанатына облыс әкімі Бейбіт Атамқұлов пен Польшаның Polpharma тобы бақылау кеңесiнiң төрағасы Ежи Старак арнайы келді. Өңір басшысы зауыт ұжымының жұмысын жоғары бағалап, сәттілік тіледі.
Жаңа жоба «SANTO» компаниясының жаңа жетістігі десе де болады. Бұл антибиотиктер бұрын өндіріліп келгенімен, GMP стандартының талабы бойынша шығарылмақ. Соған орай, зауыт тағы да тамыз айында бір желіні іске қоспақ. Яғни цех жылына 40 млн антибиотикты шығаруға қауқарлы.
– Компания өз қызметі арқылы өнімнің сапасына, қауіпсіздігі мен тиімділігіне көңіл бөлетіндігін тағы да дәлелдеді. Жаңа цех халықаралық стандарт талабына сай. Сондай-ақ, кәсіпорын толығымен өнімді басқа бөлшектермен ластанудан қорғайды. Себебі, мұнда қоршаған ортаны ластанудан сақтайтын арнайы сүзгілер орнатылған, – дейді «Santo» компаниясының бас директоры Ижи Урбанец.
Зауыттың бас директорының айтуынша, өнімдерге Ресей де қызығушылық танытуда. Яғни көрші ел дәрі-дәрмектерді экспорттауда негізгі мемлекет болмақ.
