Облысымыздағы 1022 мектепте соңғы қоңырау сыңғыры естілді. Облыс әкімі Бейбіт Атамқұлов Шымкенттегі физика-математика бағытындағы Назарбаев Зияткерлік мектебінің «Мың алғыс саған, аяулы мектебім!» атты салтанатты іс-шарасына қатысып, үлкен өмірге қадам басқалы тұрған түлектерге сәт-сапар тіледі.
– Биылғы түлектердің мектеп бітіру уақыты Тәуелсіздіктің 25 жылына тұспа-тұс келіп отыр. Демек биылғы жыл еліміз үшін де, түлектер үшін де маңызды әрі сәтті болады деген ойдамын. Сіздер Елбасы армандаған мәңгілік елдің тірегі екендіктеріңізді ешуақытта естен шығармаңыздар. 31 мың 288 түлекке ел мақтаныштарына айналып, алдағы сынақ, ҰБТ-дан жақсы көрсеткішпен өтуін тілеймін. Ал осы түлектердің ізін басып келе жатқан оқушыларды тағы бір оқу жылының сәтті аяқталуымен құттықтаймын, – деді өңір басшысы Бейбіт Бәкірұлы.
Үш жыл ішінде Назарбаев зияткерлік мектебі 12 сыныпты бітірген екінші түлектерін шығарып салып отыр. Биыл мектепті 129 оқушы бітірмек. Олардың 14-і халықаралық университеттердің грантына ие болса, 41-і Назарбаев университетінің байқауының соңғы кезеңіне өтіп, нәтижесін күтуде.
Айта кетейік, облысымызда 11-сыныпты аяқтағалы тұрған 38 мыңнан астам түлектің 1440-ы «Алтын белгіге», ал 603 оқушы «Үздік аттестат» алуға үміткер.
 |
 |
